Հայաստանի կառավարությունը այս տարի էլ աշնանացան ցորենի էլիտա սերմացու կներկրի: Նախատեսված 640 տոննայից արդեն 100 տոննան ներկրվել ու ուղարկվել է Շիրակի մարզ: Այս մասին այսօր կառավարության նիստից հետո լրագրողների հետ հանդիպման ժամանակ ասաց գյուղատնտեսության փոխնախարար Գրիշա Բաղյանը: Նախորդ տարվա աշնանացանի սերմացուից այս տարի բերք չստացած գյուղացիների դժգոհություններին էլ անդրադառնալով, փոխնախարարը գյուղացիներին խորհուրդ տվեց չմտահոգվել, ըստ նրա, այս անգամ սերմացուի հետ կապված խնդիրներ չեն ծագի, որովհետեւ գյուղացին այդ սերմացուն օգտագործում է սկսած 2010 թվականից. «Այդ ժամանակ այդ սերմացուի միջին բերքատվությունը կազմել է մեկ հեկտարից 38 ցենտներ, առանձին դեպքերում` մինչև 70 ցենտներ: Դա այն դեպքում, երբ նախորդ տարի մեր տեղական սերմացուն ընդամենը 28.9 ցենտներ բերք էր տվել: Կապված բնակլիմայական պայմանների հետ` այս տարի որոշ թերություններ եղան, մեղքը սեմացուինը չէ: Խոտածածկ էլ չկա այս տարի, ինչու չկա, խոտածածկն էլ հո գյուղատնտեսության նախարարությունը չի ցանել»: Պարոն Բաղյանը նաեւ նշեց, որ այս տարի Հայաստանում ցորենի բերքը 2.4 տոկոսով ավելի է, քան նախորդ տարի:
Արփինե ՍԻՄՈՆՅԱՆ
