Կոտայքի մարզի ընդհանուր իրավասության դատարանում՝ Հրազդանի նստավայրում, այսօր նշանակվել էր Գագիկ Աթասյանի պատվի, արժանապատվության եւ գործարար համբավին պատճառված վնասի հատուցման պահանջի հայցով նախնական դատական հերթական նիստը: Պատասխանողն էր «Հրազդան» հեռուստաընկերության տնօրեն ՄՆացական Հարությունյանը:
Դատավոր Արիստակես Սիսակյանը, առողջության հետ կապված, չէր եկել Հրազդանի նստավայր, հետեւաբար, նիստը հետաձգվեց:
Դատական նիստին մասնակցելու համար դատարան էր ներկայացել միայն հայցվորը, որն ի դեպ, տեղեկացրեց, որ այս տարվա մայիսին դիմել է դատարան եւ վիճարկում է «aravot.am»-ի հունվարի 18-ի «Հայդ պարկ» խորագրի ներքո պատասխանողի «Բացահայտում. Տարվա քաղաքացու իրական դեմքը» հրապարակումը:
Հայցվորը պահանջում էր 3 մլն. դրամի փոխհատուցում:
Գագիկ Աթասյանն «aravot.am»-ին ասաց, որ նույն պատասխանողի կողմից հրապարակումներ են եղել նաեւ «hraparak.am», «168ԺԱՄ», «mitq.am», «hetq.am»-ում: Հայցվորը հայտնեց, որ «mitq.am»-ը, դատարան դիմելուց հետո «գոյություն չունի»:
Գագիկ Աթասյանն ասաց, որ 2011թ-ին «ՇՊԱԿ» կազմակերպության կողմից ճանաչվել է «Տարվա քաղաքացի», ինչի մասին, կա նաեւ հրապարակման մեջ:
Գ.Աթասյանն ասաց.«Հրապարակման մեկնաբանությունների մեջ կան սուտ հաղորդումներ, իմ հասցեին՝ սպառնալիքներ:
Ես հրապարակումների մասին տեղեկացել եմ շատ ուշ, որովհետեւ մայրս մահացավ, ընդհանրապես սգի մեջ գտնվելով, որեւէ բան ինձ չի հետաքրքրել:
Մնացական Հարությունյանն իմ հետ ունի անձնական խնդիր, եւ իրավախախտումները քողարկելու համար անցել է այլ տարբերակի:
Այստեղ ոչ թե ես լրագրողների, ԶԼՄ-ների դեմ ինչ-որ խնդիր ունեմ, իմ հայցը կոնկրետ Մնացական Հարությունյանի դեմ է»:
Գ.Աթասյանը նաեւ ակնարկեց, որ տեսնում է միտումներ՝ դատաքննությունն այլ ընթացքով տանելու:
Ռուզան ՄԻՆԱՍՅԱՆ
