Սոցիոլոգիական հարցումների համաձայն` Հայաստանում ավելացել են սոցիալ-տնտեսական պայմաններից գոհ քաղաքացիները: « 2010-ի նոյեմբերին բնակչության մոտ 45 տոկոսն էր Հայաստանում ամեն ինչից բավարված, 2011-ին նրանց թիվը հասել է 47,6 տոկոսի»,- այսօր «Հենարան» ակումբում 2000 քաղաքացիների շրջանում նախորդ տարվա իրենց անցկացրած սոցիոլոգիական հարցումների արդյունքները ներկայացրեց «Այ Փի Սի» քաղաքական եւ սոցիոլոգիական խորհրդատվությունների ինստիտուտի վերլուծաբան Սամվել Մանուկյանը: Ըստ վերլուծաբանի, հարցվածների 10 տոկոսը գտնում է, որ ֆինանսական վիճակը բավարար է լավ ապրելու համար, ու իրենք խնդիրներ չունեն, 2-3 տոկոսը ավելի բարձր աշխատավարձ է ստանում քան ակնկալում է, բայց դժգոհ է իր կյանքից, մոտ 50 տոկոսն ավելի քիչ փող է ստանում, քան իրեն պետք է նորմալ ապրելու համար, բայց բավարարված է իր կյանքով, որովհետեւ ըստ պարոն Մանուկյանի, համակերպվել է, իսկ 37 տոկոսը համարում է, որ ավելի քիչ է ստանում, քան իրեն պետք է ու անբավարարված է է: Հարցվածների բավարարվածության մակարդակը հիմնականում ցածր է
աշխատատեղերի հարցում` 7 տոկոսն է միայն բավարարված, գների մակարդակից գոհ է 10 տոկոսը, իսկ ինքնաթիռների տոմսերի գները մատչելի են 12 տոկոսի համար: Վերլուծաբանի խոսքերով, հարցվածները ցածր են գնահատել սպառողների իրավունքների պաշտպանությունը Հայաստանում, փոխարենը գոհ են եղել հանգստի, ժամանցի բազմազանության ապահովությունից: 2010-ի համեմատ 2011-ին հարցվածները դրական փոփոխություն են արձանագրել դոլարի կուրսի կայունության հարցում, իսկ բացասական փոփոխություն` սննդի որակի բավարարվածության առումով: Ավելացել են դատական համակարգից գոհ քաղաքացիները ՝ 11 տոկոսով , դրական տեղաշարժ կա նաեւ մարդու իրավունքների պաշտպանության առումով: Իրավունքների պաշտպանությունից գոհ եղողներն ավելացել են 9 տոկոսով:
«Այ Փի Սի» քաղաքական եւ սոցիոլոլագիական խորհրդատվությունների ինստիտուտը կյանքի որակը պարզելու համար ուսումնասիրություններ է անցկացրել Հայաստանի կառավարության ֆինանսավորմամբ:
Կարդացեք նաև
Արփինե ՍԻՄՈՆՅԱՆ
