2012թ. մայիսի 9-ին Դիլիջան քաղաքի Օրջոնիկիձե փողոցի 73-րդ շենքի 4-րդ հարկից ցած նետվելու միջոցով ինքնասպանության փորձ է կատարել 27-ամյա Մարինե Սուրիկի Հախվերդյանը: Նա վնասվածքներով տեղափոխվել էր Երեւանի բուժհիմնարկներից մեկը: Կինն ամուսնացած է, ունի 4 տարեկան աղջիկ, ամուսինը ներկայումս գտնվում է Ռուսաստանում: Մ. Հախվերդյանը Հաղարծին գյուղի բնակչուհի է, Դիլիջանի Թախտա թաղամասում վարձով էր ապրում: Մարինեն ներկայումս ապրում է Հաղարծին գյուղի հորական տանը, նրա խոսքերով` ինքն ամուսնու հետ պարբերաբար հեռախոսազրույցներ է ունենում: Նա ինքնասպանության փորձից հետո ստացած վնասվածքների պատճառով դժվարությամբ է քայլում: Ոստիկանության Տավուշի քննչական բաժինը դեպքի կապակցությամբ քրեական գործ է հարուցել ՀՀ քրեական օրենսգրքի 110 հոդվածի 1-ին մասով (Սպառնալիքի, դաժան վերաբերմունքի կամ անձնական արժանապատվությունը պարբերաբար նվաստացնելու ճանապարհով անձին անուղղակի դիտավորությամբ կամ անզգուշությամբ ինքնասպանության կամ ինքնասպանության փորձի հասցնելը): Մարինե Հախվերդյանը «Առավոտի» թղթակցին ասաց, որ ինքնասպանության է դիմել ոչ թե սիրեկանի( ինչպես նախկինում տեղեկացրել ենք https://www.aravot.am/2012/05/23/73613/), այլ ծանոթի կողմից շանտաժի ենթարկվելու պատժառով: Այդ տղամարդը նախկինում դատված է : Գործով քննությունը շարունակվում է: Մենք կշարունակենք հետեւել սույն գործի ընթացքին:
Ոսկան Սարգսյան
