Շաբաթ օրը Կիեւում տրված միակ համերգի ժամանակ ամերիկյան երգչուհի Մադոննա, հենց բեմից հարցրել է իր երկրպագուներին.«Ճի՞շտ է, որ ձեր նախկին նախագահուհին հիմա բանտում է: Ինչո՞ւ: Կոռուպցիայի պատճառո՞վ: Իսկ ի՞նչ է նրա անունը: Ջուլիա՞: Նա երեխաներ ունի՞: Դուք չե՞ք ուզում պայքարել նրա համար: Դա կոչվում է ժողովրդավարություն»: Համաձայն ուկրաինական ինտերնետ-կայքերի՝ այսպես է շփվել Մադոննան իր ֆանատների հետ, որոնցից խնդրել է նաեւ ուկրաինական դրոշ: Այդ խնդրանքին ի պատասխան՝ նրան են մեկնել ռուսական եռագույնը, սակայն ավելի ուշ այն փոխել են ուկրաինական կապտադեղինով:
Հիշեցնենք, որ Ուկրաինայի նախկին վարչապետ Յուլյա Տիմոշենկոն ներկայումս բանտում է` կրում է ՌԴ-ի հետ 2009-ին կայացած «գազային բանակցություններում» պաշտոնեական լիազորությունների չարաշահման մեղադրանքով ստացած յոթնամյա ազատազրկման պատիժը: Ինքը՝ Տիմոշենկոն եւ նրա կողմնակիցները պնդում են, որ նրա հանդեպ իրականացվում է քաղաքական հետապնդում:
