Վաղը, ի պաշտպանություն բանտերում նստած իրավապաշտպանների, Բելառուսում համերաշխության ակցիաներ են լինելու: Իսկ Երեւանում այն մեկնարկեց այսօր՝ Բելառուսի դեսպանատան դիմաց: Նախաձեռնությունը Հելսինկյան ասոցիացիա իրավապաշտպան կազմակերպությանն էր: Կազմակերպության 5 անդամներ, ի պաշտպանություն «Վեսնա» իրավապաշտպան կենտրոնի ղեկավար, Մարդու իրավունքների միջազգային ֆեդերացիայի (FIDH) փոխնախագահ Ալես Բելյացկու, համերաշխության կոչերով ու ցուցապաստառներով ակցիա անցկացրին:
Ըստ կազմակերպության ղեկավար իրավապաշտպան Միքայել Դանիելյանի, Եվրոպայի կենտրոնում գտնվելով՝ Բելառուսում գործում է մահապատիժ ու մարդու իրավունքների պաշտպանության մասով Եվրոպական կոնվենցիաները չեն գործում. «Ֆլեշմոբերի, ակցիաների համար մարդկանց այնտեղ ձերբակալում են»: Իրավապաշտպանն այն կարծիքին է, որ մարդու իրավունքների պաշտպանության մասով Բելառուսը շատ բան է սովորում Հայաստանից. «Հայաստանի իշխանությունները, չեմ ասի խելոք, բայց ավելի շուստրի են»:
Կարճատեւ ակցիայի շրջանակներում իրավապաշտպանը դեսպանատանը հանձնելու համար պատրաստել էր նաեւ 5 ստորագրություններով մանիֆեստ, որտեղ էլ նրանք ներկայացրել են իրենց պահանջները, մասնավորապես՝ ազատ արձակել ճնշումների ու հետապնդումների ենթարկված ազատության համար պայքարողներին:
Արփինե ՍԻՄՈՆՅԱՆ
Կարդացեք նաև
