Այսօր «Նոյյան տապան» ակումբում «Վահե Ավետյան» հասարակական շարժման նախաձեռնող խմբի անդամներ Դավիթ Սանասարյանը, Գարեգին Չուքասզյանը, Հրանուշ Խառատյանը լրագրողներին ասում էին, որ օլիգարխ Ռուբեն Հայրապետյանից հասարակությունը պետք է մեջքով շրջվի:
Դավիթ Սանասարյանի խոսքերով՝ «Հասարակությունն իր բիզնեսի ապրանքանիշների մեծ մասից չի օգտվում: Բոյկոտելու ենք նրա արտադրանքը, տեսնենք ինչ է անելու»:
Սա ասելուն պես Դավիթ Սանասարյանը խմեց ակումբի սեղանին դրված «Նոյ» ապրանքանիշի ջուրը: Aravot.am-ը ասուլիսից հետո Դավիթ Սանասարյանի ուշադրությունը հրավիրեց՝ որ խոսում էիք Ռուբեն Հայրապետյանի արտադրանքը բոյկոտելու մասին, բայց կադրում ինքներդ օգտվում էիք դրանից՝ նա պատասխանեց. «Ես չեմ նկատել, պատահական է ստացվել, ես չեմ գնում նրա արտադրանքը, ոչ միայն չեմ գնում, այլ բոլորին խորհուրդ եմ տալիս: Նստում եմ կաֆեում, ասում եմ՝ ջուր բերեք, ասում են՝ ի՞նչ ջուր, ասում եմ՝ բացի «Նոյ»-ից ու «Բջնիից» ամեն ինչ»:
Կարդացեք նաև
Նա վստահեցրեց, որ ակումբի կազմակերպիչներին կզգուշացնեն, որ դա անելու բան չէր: Ավելի ուշ Գարեգին Չուքասզյանը եւ Դավիթ Սանասարյանը ակումբի պատասխանատուներին զգուշացրեցին, որ հաջորդ անգամ կբոյկոտեն իրենց ակումբը, եթե նման բան նկատեն: Ակումբից էլ պարզաբանեցին, որ «Նոյն» իրենց հովանավորը չէ եւ հաջորդ անգամ նման բան չի լինի:
Հռիփսիմե ՋԵԲԵՋՅԱՆ
