Եզդիները դիմել են նախագահին եւ ոստիկանապետին
«Առավոտի» տեղեկություններով, Արարատի մարզի Ջանֆիդա գյուղի բնակիչներ Ազիզ եւ Ալմաստ Բշարյանները, դաշտաքարցիներ Գոգո եւ Ռստամ Մստոյանները դիմել են ՀՀ նախագահ Սերժ Սարգսյանին եւ ոստիկանապետ Վլադիմիր Գասպարյանին:
Նրանք հայտնել են, որ Ջրաշեն գյուղի բնակիչ Թորգոմ Խուդոյանը իրենց երեխաներին Գերմանիա ուղարկելու պատրվակով իրենցից ստացել է մեծ գումարներ, սակայն գումարը ստանալուց հետո չի կատարել իր պայմանավորվածությունը:
Բշարյանները, ըստ այդ դիմումի, Խուդոյանին են տվել 11 000 ԱՄՆ դոլար, իսկ Դաշտաքար գյուղի բնակիչներ Մստոյանները՝ 20 000 ԱՄՆ դոլար:
Կարդացեք նաև
Կան եզդի համայնքի այլ բնակիչներ էլ, որոնցից դարձյալ մեծ գումարներ է ստացել Խուդոյանը:
Բշարյաններն ու Մստոյանները մինչ այդ դիմել էին նաեւ Արարատի մարզի ոստիկանապետին, իսկ այդ նույն ժամանակ էլ, ըստ մեր աղբյուրի, Թ. Խուդոյանը հանրապետությունից մեկնել է:
«Ինչո՞ւ նրա գույքը, երկու ավտոմեքենաները, բնակարանը, հողամասը կալանքի տակ դրված չեն, քանի որ մենք այդ գումարն առձեռն հանձնել ենք Թ. Խուդոյանին, եւ մեր պայմանավորվածությունն էլ եղել է վերջինի հետ»,- դիմումում գրել են տուժողները: Ի դեպ, նախագահից եւ ոստիկանապետից վերոհիշյալ անձինք պահանջում են, որպեսզի գործը Արարատի մարզի ոստիկանության վարույթից հանվի եւ ուղարկվի մեկ այլ բաժին՝ օբյեկտիվ քննության համար:
Մեր տեղեկություններով, քրեական գործ է հարուցվել Թորգոմի որդու՝ Ռոբերտի նկատմամբ, ինչի կապակցությամբ նույնպես կան բողոքներ:
«Առավոտ» օրաթերթ
