Բենիամին Սոխրաբյանցն անցյալ տարվա փետրվարի 17-ին ոստիկանության Կոտայքի բաժնի աշխատակիցների կողմից ձերբակալվել էր:
3 օր հետո Կոտայքի մարզի ընդհանուր իրավասության դատարանի որոշմամբ՝ նրա նկատմամբ խափանման միջոց էր ընտրվել կալանքը:
Նրա նկատմամբ հարուցված քրեական գործն էլ հուլիսի 18-ին ուղարկվել էր դատարան:
Այս տարվա ապրիլի 28-ին Բենիամինը դատապարտվել էր ազատազրկման 4 տարի ժամկետով, նա մեղավոր էր ճանաչվել Քրօրի 112 հոդվածի 1-ին մասի հատկանիշներով՝ կատարած հանցագործության համար:
Այդ դատավճռի դեմ էլ բողոք էր բերել նրա պաշտպանը՝ ՀՀ փաստաբանների պալատի անդամ Լեւոն Պողոսյանը:
Իսկ գործի մանրամասներն այսպիսին են: Բ. Սոխրաբյանցը բանակից գալով արձակուրդ, իր ընտանիքից տեղեկացել է, որ եղբոր հարսանիքի քավորը՝ Ս. Հակոբյանը, պարտք է 200 դոլար, եւ չի վերադարձնում:
Բենիամինը հանդիպել է քավորին, որը դարձյալ խոստացել է տալ պարտքը:
Բենիամինի արձակուրդը վերջացել է, եւ նա մեկնել է ծառայության:
Զինվորական ծառայությունն ավարտվել է, նա եկել է տուն, սակայն պարզել է, որ պարտքը դեռ չի տրվել: Ըստ գործի նյութերի, ընդհանուր ծանոթների մոտ զայրացած Բենիամինը հայհոյել է քավորի հասցեին, ինչի մասին հասցրել են նրա որդուն՝ Մուշեղին, որն էլ բջջայինով զանգել եւ հանդիպում է նշանակել Բենիամինի հետ:
Սոխրաբյանցները՝ երեք եղբայրներով գնացել են հանդիպման՝ Աբովյանի «Կոնվերս բանկի» մասնաշենքի դիմացի տարածք, ուր հանդիպել են Մ.Հակոբյանին:
Սկսվել է քաշքշուկ, «եւ այդ ժամանակ էլ Բ. Սոխրաբյանցը գետնից վերցնելով չպարզված կտրող-ծակող գործիքը՝ հարվածել է Մուշեղ Հակոբյանի որովայնին, նրան պատճառելով առողջությանը ծանր վնաս»: Այն գնահատվում է կյանքին սպառնացող վտանգ:
Պաշտպան Լ. Պողոսյանը շեշտում է, որ իր պաշտպանյալը գտնվել է բարոյահոգեբանական ճնշման տակ, տվել է քննիչի թելադրանքով ինքնազրպարտչական ցուցմունքներ, չի ունեցել պաշտպան եւ չի ստացել իրավաբանական օգնություն, իսկ որ, ըստ պաշտպանի, «ենթադրյալ տուժող Մուշեղ Հակոբյանն էլ հայտնել է, որ մարմնական վնասվածքները ստացել է գետնին վայր ընկնելու հետեւանքով»:
Վերաքննիչ դատարանը հուլիսի 9-ին մերժել է պաշտպանի բողոքը եւ առաջին ատյանի դատավճիռը թողել է անփոփոխ: Դատարանը հանգել էր այն եզրակացության, թե Բենիամինի՝ իրեն մեղավոր չճանաչելը չի նշանակում, թե նա այդ հանցանքը չի կատարել:
Բ. Սոխրաբյանցի պաշտպանը դիմել է ՀՀ վճռաբեկ դատարան:
ՌՈՒԶԱՆ ՄԻՆԱՍՅԱՆ
«Առավոտ» օրաթերթ
