Օգոստոսի 1-ին ՀԱԿ-ը մի քանի երիտասարդական հասարակական կազմակերպությունների ներկայացուցիչների հետ նախագահի նստավայրի մոտ բողոքի ցույց էր անցկացնում` ՀԱԿ ակտիվիստներին ազատ արձակելու պահանջով: Ակցիայի ժամանակ Կոնգրեսի անդամ Վարդգես Գասպարին ոստիկաններին «աննամուս, խուլիգան, լակոտ» էր անվանում, ասում, որ նրանց «ուղեղի տեղը թրիք է»: Նշենք, որ ոստիկաններն այս անգամ որեւէ կերպ չէին արձագանքում վիրավորանքներին:
Բացի այդ, ակցիան անցկացվում էր «Fuck you, dictator», «Fuck system» կարգախոսներով ու ցուցապաստառներով: Այսօր Aravot.am-ը այս առնչությամբ ՀԱԿ խմբակցության պատգամավոր Լյուդմիլա Սարգսյանից հետաքրքրվեց` առաջիկայում Կոնգրեսի ցույցերում, հավաքներում հնարավո՞ր է, որ այդ բառերի հայերեն համարժեքներն էլ գրվեն ու համանման հայերեն կարգախոսներն էլ լինեն: Տիկին Սարգսյանը ծիծաղեց: Նա վստահեցրեց, որ ինքը պաստառներին ուշադրություն չի դարձրել. «Ես գտնում եմ, որ նման ակցիաների ժամանակ պետք է շատ կարգապահ լինել, կազմակերպված լինել եւ համապատասխանել օրենքի տառին: Եկեք չմոռանանք, որ այնտեղ տարբեր տիպի մարդիկ են գալիս աջակցության եւ ամեն մեկն իր պաստառով է գալիս»: Մենք ճշտեցինք, այսինքն` այդ պաստառները հնարավոր է Կոնգրեսի հետ կապ չունե՞ն, Կոնգրեսի կողմից պատրաստված չլինե՞ն` տիկին Սարգսյանը պատասխանեց. «Իհարկե, պաստառների մի մասը Կոնգրեսի երիտասարդներն են պատրաստում, կան պաստառներ, որոնք մարդիկ իրենց հետ են բերում` ըստ իրենց հոգեվիճակի եւ մոտեցման: Այնպես որ ես չեմ կարծում, որ դա պետք է մի հատ էլ հայերենով ներկայացվեր»:
Մեր դիտարկմանը, որ «Fuck»-ի հայերենը դժվար թե գրվեր, բայց Դուք կոնկրետ դե՞մ եք, որ նման պաստառներ լինեն` Լյուդմիլա Սարգսյանը պատասխանեց. «Ես դեմ եմ, չեմ ընդունում նման մոտեցումը: Դուք ձեր հարցադրումով ինձ անակնկալի բերեցիք, ես չէի նայել պաստառները, հետեւաբար չեմ հետաքրքրվել` օրենքով դա կարգավորվո՞ւմ է, թե՞ ոչ: Բայց ես համենայնդեպս կարծում եմ` օրենքը չի արգելում, որ մարդն իր մտածածը նաեւ պաստառի տեսքով ներկայացնի: Վստահ եմ, որ օրենքը այդ խնդիրը չի կարգավորում»:
Կարդացեք նաև
Հռիփսիմե ՋԵԲԵՋՅԱՆ
