ՀՀ սփյուռքի նախարարությունում կայացավ հանդիպում սիրիահայերին աջակցություն ցուցաբերելու պատրաստակամություն հայտնած հասարակական կազմակերպությունների և շարժումների ներկայացուցիչների հետ:
ՀՀ սփյուռքի նախարար Հ.Հակոբյանը շնորհակալություն հայտնեց հանդիպմանը ներկա` Դատական փորձագետների և իրավագետների ասոցիացիայի, ՍԴՀԿ-ի, «Հայրենադարձության և սիրիահայության աջակցության» նախաձեռնող խմբի, «Հայրենադարձ ընտանիքներին աջակցություն» ֆեյսբուքյան նախաձեռնության ներկայացուցիչներին` համախմբվելու և ճգնաժամային իրավիճակում հայտնված մեր հայրենակիցներին աջակցություն ցուցաբերելու պատրաստակամության համար:
Նախարարը տեղեկացրեց, որ ՀՀ նախագահի հանձնարարությամբ սիրիահայերի հիմնախնդիրներով զբաղվող գլխադասային պետական մարմինը ՀՀ սփյուռքի նախարարությունն է, որտեղ ստեղծվել է աշխատանքային խումբ, որը ուսումնասիրել և ուսումնասիրում է սիրիահայերի կողմից բարձրացված հիմնախնդիրները` դասակարգելով և վերահասցեագրելով դրանք համապատասխան պետական կառավարման մարմիններին:
Տիկին Հակոբյանը ներկայացրեց վերջին շրջանում Հայաստան ժամանած և ՀՀ սփյուռքի նախարարություն դիմած սիրիահայերի կողմից բարձրացված հիմնախնդիրները և տեղեկացրեց, որ մի քանի օրից` սահմանված կարգով հրապարակվելուց հետո, ուժի մեջ կմտնեն հուլիսի 26-ին ՀՀ կառավարության կողմից ընդունված որոշումները, որոնց համաձայն, ՀՀ քաղաքացիություն ստացած սիրիահայերն առաջին անգամ անձնագիր կարող են ստանալ Դամասկոսում` ՀՀ դեսպանատանը և Հալեպում` ՀՀ գլխավոր հյուպատոսությունում, ինչպես նաև սիրիահայերը այսուհետ վիզա կարող են ստանալ ոչ միայն ՀՀ դիվանագիտական ներկայացուցչություններում, այլև ՀՀ սահմանի վրա:
Կարդացեք նաև
Անդրադառնալով կրթության ոլորտում կատարված աշխատանքներին` նախարարը նշեց, որ հուլիսի 30-ից Երևանի Ստ. Շահումյանի անվան դպրոցում ՀՀ սփյուռքի և ՀՀ կրթության և գիտության նախարարությունների և Երևանի քաղաքապետարանի ջանքերով մեկնարկել են արևելահայերենի դասընթացները և քննարկվում են որոշ դպրոցներում արևմտահայերենի ուսուցման դասընթացներ կազմակերպելու հնարավորությունները:
Տիկին Հակոբյանը ավելացրեց նաև, որ ՀՀ սփյուռքի նախարարությունը դիմել է ՀՀ ԿԳՆ՝ քննարկելու և գտնելու հնարավորություններ սիրիահայերի` բուհեր ընդունվելու հարցազրույցներն առավել պարզեցված կարգով անցկացնելու, ինչպես նաև հավասարեցնելու նրանց ուսման վարձավճարները ՀՀ քաղաքացիների ուսման վարձավճարներին: Արդյունքում ՀՀ կրթության և գիտության նախարարությունը հայտնել է իր պատրաստակամությունը` քայլեր ձեռնարկելու նախապատրաստական ֆակուլտետների վարձավճարները 50 տոկոսի չափով հաշվարկելու, ինչպես նաև ուսման վարձավճարների զեղչման հարցը, ելնելով տվյալ անձի սոցիալական վիճակից, քննարկելու վերաբերյալ:
Հնարավորության սահմաններում առաջնահերթության կարգով ուսանողական հանրակացարաններում սենյակներ կտրամադրվեն սիրիահայ ուսանողներին:
Նախարարը նշեց, որ ՀՀ առողջապահության նախարարությունը լուծում է առողջական խնդիրներ ունեցող սիրիահայերի բժշկական օգնության և սպասարկման հարցերը:
Նախարարն ընդգծեց, որ ելնելով ստեղծված իրավիճակից` կազմակերպվելու են հավելյալ չվերթեր դեպի Սիրիա` այնտեղից` երեխաներ տեղափոխելու և նրանց ամառային հանգիստը Հայաստանում կազմակերպելու համար: Երեխաները մասնավորապես կմասնակցեն նաև <Արի տուն> ծրագրին:
Նախարարը տեղեկացրեց նաև, որ գործող աշխատանքային խումբը` ՀՀ սփյուռքի նախարարության աշխատակազմի ղեկավար Ֆ.Զաքարյանի գլխավորությամբ, ընդունում է նախարարություն այցելած սիրիահայերին, ինչպես նաև` համագործակցում խնդրո առարկայով մտահոգ բոլոր կառույցների հետ:
Հանդիպման ընթացքում հասարակական կազմակերպությունների և շարժումների ներկայացուցիչները իրենց պատրաստակամությունը հայտնեցին սիրիահայերի աջակցության համար, այդ թվում մասնակցել օդանավակայանում սիրիահայերի դիմավորմանը, անհրաժեշտության դեպքում սիրիահայերին տրամադրել իրավաբանական խորհրդատվություն և հոգեբանի ծառայություններ:
Հանդիպման ժամանակ ևս մեկ անգամ շեշտվեց սիրիահայերի խնդիրները լուսաբանելիս լրատվամիջոցների կողմից զուսպ և զգուշավոր մեկնաբանությունների կարևորությունը, քանի որ տեղին չօգտագործված ցանկացած խոսք կարող է վտանգի տակ դնել սիրիահայ համայնքին և խոչընդոտել խնդիրների լուծմանը:
Հանդիպման մասնակիցները միակամ էին ուժերի համախմբման և ՀՀ սփյուռքի նախարարության համակարգմամբ սիրիահայերի աջակցության աշխատանքների կազմակերպման հարցում:
ՀՀ սփյուռքի նախարարություն
