Հայաստանի երիտասարդական հիմնադրամի (ՀԵՀ) աջակցությամբ Գեղեցիկ արվեստների ազգային ակադեմիան և «Հայաստանի ոչ պետական բուհերի ուսանողական կենտրոն» ՀԿ-ն օգոստոսի 1-ին ՀԵՀ-ում կազմակերպել էին «Ամառային գույներ» խորագրով ցուցահանդեսը, որտեղ բուհի ուսանողները ներկայացրել էին իրենց գրաֆիկական աշխատանքները և մոդելավորած հայկական ազգային տարազները։
Գեղեցիկ արվեստների ազգային ակադեմիայի ռեկտոր Էդուարդ Սեդրակյանը ցուցահանդեսի բացման խոսքում նշեց, որ ակադեմիան գործունեության 16 տարիների ընթացքում ավելի քան 170 ներբուհական, միջազգային, հանրապետական ցուցահանդեսների է մասնակցել։ Բուհի ուսանողները մոտ 60 միջազգային ցուցահանդեսներից Հայաստան են վերադարձել բարձրակարգ դիպլոմներով։ Էդուարդ Սեդրակյանը նկատեց, որ նման ցուցադրություններում են ծնվում մեծ մրցույթները, այստեղ են կոփվում ստեղծագործողները, և այս փոքրիկ քայլերն են, որ տանում են դեպի միջազգային մեծ ասպարեզ։
«Ամառային գույներ» խորագրով ցուցադրությանը ներկայացվեց 6 ուսանողի 32 աշխատանք։ Միջոցառման նպատակն էր հնարավորություն տալ ուսանողներին ներկայացնել իրենց ստեղծագործություններն ավելի մեծ լսարանի, ինչպես նաև երիտասարդության շրջանում սերմանել սեր արվեստի ու գեղեցիկի նկատմամբ։
Հայաստանի երիտասարդական հիմնադրամի
հասարակայնության հետ կապերի ծառայություն
