Իսկ չեխերը հրաժարվում են թռչել
Դատելով ամենից, «Զվարթնոցը» դժգոհ է մնացել «Արմավիայի» հետ ձեռք բերված պայմանավորվածություններից, որոնք կնքվեցին այս տարվա գարնանը:
Պատահական չէ, որ ավիաընկերության կողմից պարտքերի մարման ամենաչնչին ուշացմանը «Զվարթնոցը» պատասխանում է կոշտ գործողություններով` ընդդեմ «Արմավիայի», ստեղծելով արհեստական քաշքշուկներ, թռիչքների ուշացումներ, ինչից տուժում են ուղեւորները:
Հիշեցնենք, որ «Արմավիան» պահանջում էր «Զվարթնոցից» իջեցնել օդանավակայանի մատուցած ծառայությունների գները, որոնք ամենաթանկն են ոչ միայն Կովկասում, այլեւ ԱՊՀ-ի եւ Միջին Արեւելքի ողջ տարածաշրջանում:
Օրինակ, Սիրիայի Հալեպ քաղաքի օդանավակայանում «Արմավիայի» ինքնաթիռները վառելիքով լիցքավորվում են շատ ավելի էժան, քան «Զվարթնոցում»: Մեկ տոննայի դեպքում տարբերությունը հասնում է 250 դոլարի։
Ի դեպ, մեր տեղեկություններով, «Արմավիա» ավիաընկերությունում պայմանագրային հիմունքներով աշխատող չեխ օդաչուները հրաժարվում են թռչել դեպի Սիրիա, քանի որ Չեխիայի արտգործնախարարությունը հորդորել է իր երկրի քաղաքացիներին՝ զերծ մնալ հակամարտության օջախներ այցելելուց։ Թռիչքները դեպի Սիրիա իրականացնում են բացառապես հայ օդաչուները։
«Հայոց աշխարհ»
