Ազգային ժողովի պատգամավոր Էդմոն Մարուքյանը կարծում է, որ Տեղական ինքնակառավարման մարմինների շրջանում տեղեկատվության, իրավական գիտելիքների եւ, ընդհանրապես, ինստիտուցիոնալ զարգացման առումով կրթության պակաս կա:
Այդ բացը լրացնելու համար էլ այսօր «ՀԿ Կենտրոն» քաղաքացիական հասարակության զարգացման հասարակական կազմակերպության ջանքերով ու «Counterpart international» կազմակերպության ֆինանսավորմամբ «ՏԻՄ-երի կարողությունների զարգացում» վերապատրաստման դասընթացը մի սեղանի շուրջ էր հավաքել Լոռու եւ Շիրակի մի շարք համայնքների ղեկավարներին, համայնքների աշխատակազմի ղեկավարներին եւ որպես դասընթացավար ընտրված պատգամավորին:
«Շարունակական, անընդհատ կրթությունը կարեւոր է, անհրաժեշտ է անընդհատ թարմացնել գիտելիքները: Անհրաժեշտություն կա տեղի ունեցած օրենսդրական նոր փոփոխությունները, իրավական դրույթները ներկայացնելու ՏԻՄ-երի ներկայացուցիչներին, որպեսզի նրանք վերադառնան իրենց համայնքներ ու այդ գիտելիքները կիրառեն առօրյա գործունեության մեջ»,-նման դասընթացների անհրաժեշտության ու կարեւորության մասին է պատմում Մարուքյանը` նշելով սակայն, որ գործընթացը երկկողմանիություն է պահանջում:
«Երկկողմանի գործընթաց է, միայն տալով չէ, մյուս կողմից էլ պիտի հետաքրքրություն լինի եւ կամք լինի դա կիրառելու համար»:
Կարդացեք նաև
Կենտրոնում հավաքված ՏԻՄ–երի նորընտիր ներկայացուցիչները, ովքեր արդեն անցել են ընտրությունների միջով, մի քանի օրում հնարավորություն կունենան ուսումնասիրելու ՏԻՄ-ի օրենսդրության ընդհանուր նկարագիրը, խորացնելու գիտելիքները պետական եւ տեղական մարմինների փոխհարաբերությունների ոլորտում, գիտելիքներ ստանալ ՏԻՄ-երի նկատմամբ վարչական հսկողության, կադրերի կառավարման, առաջնորդության եւ ռազմավարական պլանավորման եւ այլ թեմաներից:
«ՀԿ Կենտրոն» քաղաքացիական հասարակության զարգացման ՀԿ ղեկավար Արփինե Հակոբյանն էլ նշում է, որ դասընթացը հնարավորություն կտա ՏԻՄ ներկայացուցիչներին ստացած գիտելիքները կիրառել ու անհրաժեշտ քայլերն անել` զարգացնելու իրենց համայնքները:
Նրա կարծիքի հետ համամիտ է նաեւ Մարալիկի քաղաքապետ Արտակ Գեւորգյանը:
«Յուրաքանչյուր դասընթացի կազմակերպում ինքնին կարեւորություն է, քանի որ դասընթացների ժամանակ մենք ձեռք ենք բերում լրացուցիչ գիտելիքներ, որոնք վերաբերում են մեր աշխատանքին, մեր գործունեությանը, կարողանում ենք ճիշտ կազմակերպել մեր աշխատանքը»:
Նա մտադիր է դասընթացի հաջորդ օրերին իր աշխատակիցներին եւս գործուղել Վանաձոր:
Անուշ ԲՈՒԼՂԱԴԱՐՅԱՆ
