«Մինչեւ ինստիտուցիոնալ փուլը՝ 2008-ի օգոստոսը, երբ ՀԱԿ-ը կազմավորվեց, հիմնական առաքելությունը երկրում իշխանափոխություն իրականացնելն էր: Իսկ 2008-ի կեղծված ընտրությունների արդյունքում խնդիրները ավելացան եւս մեկով՝ սահմանադրական կարգի վերականգնում: Իհարկե, պետք է արձանագրել, որ թեեւ լուրջ կորուստների գնով, բայց չորս տարի անց ՀԱԿ-ը կարողացավ մնալ, որպես քաղաքական միավոր: Իհարկե, ոչ առաջատար, ինչպես նախկինում: Բայց նաեւ՝ չլուծված խնդիրների եւ արձանագրված պարտությունների ծանր գնով»,- Aravot.am-ի հետ զրույցում պատասխանելով հարցին՝ այս չորս տարիների ընթացքում, ձեր կարծիքով, ՀԱԿ-ին հաջողվե՞ց իր առաքելությունն իրականացնել, ասաց Ժառանգություն» կուսակցության գլխավոր քարտուղար Ստեփան Սաֆարյանը:
Մեր զրուցակիցը դժվարացավ միարժեք գնահատականներ տալ ՀԱԿ-ի գործունեությանը, քանի որ, նրա կարծիքով, ՀԱԿ-ի ղեկավարությանը հաջողվեց պահել շարժման մի փոքր հատված, ինչը արվեց նաեւ սխալների եւ կորուստների գնով: «Այսօր դժվար է ՀԱԿ-ը դիտարկել , որպես քաղաքական ուժերի մեծ միավորում: Այն փոքրիկ քաղաքական սուբյեկտների միավորում է, որը հավասարազոր է գրեթե որեւէ կուսակցության»,- կարծում է Ստեփան Սաֆարյանը:
Նելլի ԳՐԻԳՈՐՅԱՆ
Կարդացեք նաև
