Վահե Ավետյանի հիշատակին մոմավառություն «Հարսնաքար» ռեստորանային համալիրի մոտ, Երեւան, 30-ը հունիսի, 2012թ.
Ոստիկանությունը խոչընդոտում է Վահե Ավետյանի իրավահաջորդ` նրա հայր Գառնիկ Ավետյանի փաստաբանների աշխատանքը` մինչ օրս նրանց չտրամադրելով քրեական գործի նյութերը: Այդ մասին «Ազատություն» ռադիոկայանի հետ զրույցում հայտարարեց Գառնիկ Ավետյանի փաստաբան Տիգրան Եգորյանը։
Հիշեցնելով, որ քրեական գործը հարուցվել է մոտ մեկեւկես ամիս առաջ, նա ընդգծեց, որ նյութերն իրենց չտրամադրելով` Ոստիկանությունը ոտնահարում է օրենքը:
Ազգային ժողովի hանրապետական պատգամավոր, գործարար Ռուբեն Հայրապետյանի ընտանիքին պատկանող «Հարսնաքար» ռեստորանային համալիրում հունիսի 17-ին տեղի ունեցած դաժան ծեծի հետեւանքով երեք զինվորական բժիշկներ հայտնվեցին հիվանդանոցում։ Նրանցից հատկապես ծանր վնասվածքներ ստացած Վահե Ավետյանը միջադեպից 12 օր անցմահացավ։
«Ամսի [հուլիսի] 25-ին մենք ներկայացրեցինք միջնորդություն` գործի նյութերին ծանոթանալու եւ պատճենները տրամադրելու մասին։ Այդ միջնորդությանը ծանոթացավ քննչական խմբի ղեկավար Ռուբեն Մկրտչյանը` աշխատասենյակում իր, եւ մեզ հայտնեց` ինձ, Լուսինե Հակոբյանին եւ Գառնիկ Ավետյանին, որ «վաղը», այսինքն` ամսի 26-ին, ժամը 2-ին, «կարող եք զանգահարել, գալ, ստանալ պատճենները եւ ծանոթանալ բոլոր այն նյութերին, որոնց պատճենները ստանալու իրավունք քրեական դատավարությունը չի նախատեսում», – փոխանցեց փաստաբանը։
Կարդացեք նաև
«Ողջ [հուլիսի] 26-ին [Ոստիկանության քննչական գլխավոր վարչության հատկապես կարեւոր գործերի բաժնի քննիչ Ռուբեն Մկրտչյանը] չէր պատասխանում իմ հեռախոսազանգերին», – շարունակեց Եգորյանը: – «Ամսի 27-ին նոր ես կարողացա նրա հետ կապվել` հեռախոսով, եւ նա ասաց ինձ, որ այսուհետ բոլոր խոսակցությունները վարելու է գրավոր, եւ խնդրեց պահպանել միայն այդ շփման ռեժիմը եւ հայտնեց, որ մեր ներկայացրած միջնորդությանը նա գրավոր կպատասխանի։ Ես առարկեցի` ասելով, որ «չէ որ դուք արդեն բավարարեցիք էդ միջնորդությունը եւ մեզ ասացիք, որ ներկայանանք` ստանալու համար պատճենները եւ ծանոթանալու համար»։ Նա նորից կրկնեց, որ «ոչ, ես գրավոր կպատասխանեմ»։
«Սա ուղղակի անհավանական հակասություն է վարույթ իրականացնող մարմնի կողմից` իր գործողությունների եւ իր հայտարարությունների, որովհետեւ նա պաշտոնատար անձ է, իր պաշտոնեական լիազորությունների իրականացման ընթացքում ծանոթանալով մի փաստաթղթի` հայտարարում է իր որոշման մասին, այնուհետեւ, ըստ էության, հրաժարվում է այդ որոշումից», – ընդգծեց փաստաբանը` հավելելով. – «Սա առնվազն անհասկանալի է»։
Սարգիս Հարությունյան
«Ազատություն» ռադիոկայան
