«Արջերի քարանձավը Կովկասում ամենախոշորն է եւ կարող է զբոսաշրջային բրենդ հանդիսանալ: Պահպանության խնդիրը բարձրացնելով` պարզապես ցանկանում ենք հանրությանն իրազեկել դրա մասին: Քարանձավը գեղեցիկ է եւ ունի օգտագործման պոտենցիալ հնարավորություններ, ուստի հետագա սերունդներին փոխանցելու համար անհրաժեշտ է կարգավորել այցելությունները»,-այսօր «Արմատ» ակումբում ասաց «Թռչկան» քաղաքացիական նախաձեռնության անդամ Լևոն Գալստյանը: Նա հավելեց, որ Արջերի քարանձավի գոյացություններն առաջացել են հազարավոր տարիների ընթացքում. «Չի կարելի դրանք ջարդել եւ տանել տուն, դրանք հրաշքներ են, որոնք կարող ենք ցույց տալ»:
«Պատմամշակութային արգելոց թանգարանների և պատմական միջավայրի պահպանության ծառայության» ՊՈԱԿ-ի տնօրեն Արտավազդ Զաքյանն ասաց, որ հավաստի չէ այն կարծիքը, թե պատկան մարմիններն իրազեկված չեն Արջերի, Մոզրովի եւ Մագիլի քարանձավների պահպանության խնդրից. «Ցանկացած խնդրի դեպքում ստեղծվում է աշխատանքային խումբ եւ տեղում իրականացվում ուսումնասիրման աշխատանքներ: Արջերի եւ Մոզրովի քարանձավների մուտքերը բազմիցս փակվել են մեր աշխատակիցների կողմից եւ հետագայում հայտնաբերվել բացված: Նույնիսկ ոստիկաններն են համապատասխան աշխատանքներ իրականացրել օրինազանց արշավականների հետ»: Պարոն Զաքյանը հավելեց, որ Մոզրովի քարանձավն առաջիկայում հերմետիկ կփակվի` քարանձավի միկրոկլիմայի պահպանման նպատակով, իսկ հետագայում հնարավոր կլինի զբոսաշրջիկների մուտքը քարանձավ:
Կարդացեք նաև
Լուիզա ՍՈՒՔԻԱՍՅԱՆ
