Այսօր «Արցախ» ակումբում «Սոցիոմետր» կենտրոնի նախագահ Ահարոն Ադիբեկյանը նշեց, որ իրենք դեռեւս 2011-ին հենակետային հարցումներ են արել՝ որոշելու, թե ովքեր են նախագահի հավանական թեկնածուների ցանկում. «Խորհրդարանական ընտրություններն այդ ցանկի մեջ նորություն չմտցրեցին: Խնդիրն այն է, որ ընտրություններից հետո էլեկտորատի վերախմբավորում տեղի կունենա, քանի որ կենտրոնական խաղացողը այս ընտրաշրջանում՝ ԲՀԿ-ն, դուրս եկավ կոալիցիայից: Նրա ձայների մոտ 60 %-ը իշխանական թեւն է, 40%-ը՝ ընդդիմադիր: Դուրս գալով իշխանականից, նա հավանաբար կկորցնի իշխանականի ձայների զգալի մասը, իսկ ընդդիմադիր ձայներ դժվար վերցնի, որովհետեւ նա հնարավորինս հավաքել է ընդդիմադիր դաշտում, որտեղ խաղում են ՀԱԿ-ը, ՀՅԴ-ն, «Ժառանգությունը»:
Հաջորդ հարցումը սոցիոլոգը կանի աշնանը՝ իմանալու, թե ընդդիմադիր դաշտն ինչպես կներկայանա՝ միասնակա՞ն թեկնածուով, թե՞ առանձին. «Եթե առանձին-առանձին հանդես գան, Սերժ Սարգսյանի խնդիրը կհեշտանա, քանի որ ուժերը կպառակտվեն, ծավալուն ձայն չի լինի: Եթե միանան՝ դա բավականին լուրջ խնդիր է, քանի որ բոլոր դեմքերը՝ Գագիկ Ծառուկյանը, Լեւոն Տեր-Պետրոսյանը, Րաֆֆի Հովհաննիսյանը, Վահան Հովհաննիսյանը, բավականին ամբիցիոզ դեմքեր են եւ չեմ պատկերացնում՝ նրանք ո՞նց կարող են զիջումների գնալ»:
Ադիբեկյանի ասելով՝ ՀՅԴ-ի վարկանիշն ավելի բարձր է, քան նրա առանձին թեկնածուների: Նա նաեւ նշեց, որ իշխանական դաշտում, բացի Սերժ Սարգսյանից, լուրջ դեմք չի երեւում. «Մնացած դեմքերը՝ գործող վարչապետը, Արթուր Բաղդասարյանը այնքան էլ մեծ քաղաքական վարկանիշ չունեն, որ կարողանան մրցակցել Սերժ Սարգսյանի հետ: Ամեն ինչ կախված է ԲՀԿ-ից ու Ռոբերտ Քոչարյանից, թե ինչ որոշում նրանք կարող են կայացնել, այդտեղից էլ կգնան մյուս հարցերը»:
Նա նաեւ նշեց, որ ՏԻՄ ընտրություններից շատ բան կախված կլինի, որովհետեւ ընտրված քաղաքապետերը, գյուղապետերը աշխատելու են կոնկրետ կուսակցության օգտին:
Կարդացեք նաև
Հարցին՝ Սերժ Սարգսյանին հիմնական մրցակից ընդդիմադիր դաշտից ում եք տեսնում՝ անուններ չտվեց՝ ասելով, որ բոլորն էլ կարող են լինել. «Հիմնական մրցակից չկա, հիմնականն այն է, երբ ձայների մեծ զանգված ունի: Երբ նայում ենք «Ժառանգությանը», ՀՅԴ-ին ու ՀԱԿ-ին, նրանք ձայների նույն տոկոսն ունեն: Լեւոն Տեր-Պետրոսյանը, ճիշտ է, նախագահական ընտրություններին մեծ ձայն հավաքեց, Երեւանի քաղաքապետի ընտրություններին մեծ ձայն հավաքեց, բայց այդ ձայները մշտական չեն: Այն 6-7 տոկոսը, որ ձայնը տվել են ՀՅԴ-ին, ՀԱԿ-ին, հույս ունենալով, որ նրանք կհաղթեն, նրանք չեն հաղթում՝ հարցական է, թե կուսակցություններից հիասթափվածների ձայներն ուր են գնալու: Ամենալուրջ խնդիրն այն է, թե ԲՀԿ-ի ձայներն ում կծառայի՝ Քոչարյանին, Ծառուկյանին, Օսկանյանին, թե՞ ուրիշի: 2-3 տարվա հարցումներով Ծառուկյանը միշտ Ռոբերտ Քոչարյանին գերազանցել է, որովհետեւ Գագիկ Ծառուկյանն ավելի մոտ է ընդդիմադիր հատվածին, քան Ռոբերտ Քոչարյանը»:
Հարցին՝ Գագիկ Ծառուկյանին տեսնո՞ւմ եք, որ առաջադրվի նախագահի թեկնածու՝ պատասխանեց. «Նա Յանուկովիչից ինչո՞վ է պակաս, որ չառաջադրվի: Եթե համագումարը գտավ, որ Ռոբերտ Քոչարյանն անցողիկ չի, չմասնակցե՞ն, ո՞ւմ առաջադրեն»:
Հռիփսիմե ՋԵԲԵՋՅԱՆ
