«Դինո գոլդ մայնինգ քամփնի» ՓԲԸ-ն այս տարվա մայիս ամսին պետք է արդեն հայտարարեր հետախուզական աշխատանքների արդյունքները, արդյոք կա՞ն անհրաժեշտ պաշարներ Շահումյանի ոսկու բազմամետաղային հանքավայրը բաց եղանակով շահագործելու համար, թե՞ ոչ: Բայց անցած տարվա վերջին հետախուզական աշխատանքների ընթացքում պարզվեց, որ հայտնաբերված երակները ավելի լայնատարած ձեւով են տարածվում եւ անհրաժեշտություն առաջացավ հետախուզական աշխատանքներն ընդլայնելու: «Բավականին հարուստ ստորգետնյա երակներ կային, որոնք շարունակվում էին տարածվել եւ որոշեցինք եւս 9 մլն դոլար ներդնել` այդ հետախուզությունն ընդլայնելու եւ երակների վերջը գտնելու համար: Այս տարի 17 մլն դրամ ենք ներդրել հետախուզության համար: Պետք է վերջնական արդյունք ունենանք, որպեսզի հասկանանք քանի տարվա պաշար կա, ի ՞նչ քանակով կկարողանանք արտադրել, եթե պետք է արտադրենք, դրա համար եւս մի քանի ամիս ժամանակ է հարկավոր: Վերջնական արդյունքների մասին հայտարարություն կանենք 2013 թ.-ի փետրվար-մարտ ամիսներին եւ այդ ժամանակ կասենք, բաց հանք կարո՞ղ ենք ունենալ, թե ՞ ոչ», – ասել է ընկերության վարչական հարցերով տնօրեն Հրաչ Ջաբրայանը:
Պարոն Ջաբրայանը նշեց, որ բաց հանքը շահագործելու որոշում կայացնելու դեպքում, այն կարվի միայն միջազգային ստանդարտներին համապատասխան` Կանադայում` Քվեբեկում, քաղաքի կենտրոնում անցած տարվա մայիսից գործող բաց հանքի շահագործման օրինակը բերելով:
«Եթե ժողովուրդը չուզի բաց հանք, բաց հանք չի լինի, որեւէ մեկը ժողովրդին չի կարող ստիպել հակառակը, այս քաղաքը ժողովրդի քաղաքն է, եթե բաց հանք պիտի լինի` ապա ժողովրդի համաձայնությամբ, իհարկե կառավարության եւ մեր համաձայնությամբ նաեւ: Ժողովուրդը պիտի համոզվի, որ բաց հանքն իր ապագայի համար լավ է, սոցիալական ծրագերը կտասնապատկվեն, աշխատատեղեր կստեղծվեն եւ այլն: Ես համաձայն եմ բաց հանք բացելուն, միայն, եթե այն պետք է գործի կանադական, միջազգային ստանդարտներով, իսկ եթե այստեղի ստանդարտներով պետք է լինի` դեմ եմ: Բաց հանքը, եթե պետք է օգուտ լինի ժողովրդին ու երկրի բյուջեին, թո’ղ լինի, իսկ եթե օգուտ չպիտի լինի` թող չլինի», – հավելել է պարոն Ջաբրայանը:
Կարդացեք նաև
Մերի ՍՈՂՈՄՈՆՅԱՆ
