ՀՀ կառավարության օգոստոսի 2-ի նիստում ընդունվելիք որոշմամբ կստեղծվի «Հայ արտ սինեմա» հիմնադրամ, որի հիմնադիրներն են լինելու ռեժիսորներ, Կինոյի և թատրոնի ինստիտուտի ռեկտոր Արմեն Մազմանյանը (Հայաստան), Ռոման Բալայանը (Ուկրաինա) և Հայաստանի Հանրապետությունը` ի դեմս Մշակույթի, Կրթության և գիտության նախարարությունների:
ՀՀ մշակույթի նախարար Հասմիկ Պողոսյանի կողմից ներկայացվելիք որոշման նախագծով նախատեսվում է «Հայ արտ սինեմա» հիմնադրամի գործադիր տնօրենի ժամանակավոր պաշտոնակատար նշանակել պրոդյուսեր, «Մոսկվա» կինոթատրոնի տնօրեն Մարտին Ադոյանին:
Հիմնադրամի կառավարման մարմիններն են լինելու 9 անդամից բաղկացած հոգաբարձուների խորհուրդը և կառավարիչը` գործադիր տնօրենը:
Հիմնադրամը շահույթ ստանալու նպատակ չի հետապնդելու: Տարբեր աղբյուրներից ստացված միջոցները, ինչպես նաև` իր տնտեսական գործունեությունից, ուղղվելու են միայն հիմնադրամի կանոնադրական նպատակների իրականացմանը. աջակցել ժամանակակից հայ կինոյի, կինեմատոգրաֆիայի զարգացմանը, կրթական համակարգում ստեղծել ռեժիսուրայի բարձրագույն դասընթացներ, նպաստել կինեմատոգրաֆիայի բնագավառում նոր, հիմնարար և կայուն գիտելիքների և փորձի համար անհրաժեշտ միջոցների ձեռքբերմանը:
«ՓԱՍՏԻՆՖՈ»
