Aravot.am-ն այսօր տեղեկացրել էր, որ Խոսրովի արգելոցում կառուցված ապօրինի շինարարության ապամոնտաժման պահանջով երեկ բնապահպան-ակտիվիստների կազմակերպած բողոքի ակցիայի արդյունքում ՀՀ բնապահպանության նախարարությունում այսօր հրավիրվել է քննարկում՝ բնապահպան ակտիվիստների և նշված խնդիրը քննող միջգերատեսչական հանձնաժողովի անդամների մասնակցությամբ:
Քիչ առաջ բնապահպան-ակտիվիստ Եղիա Ներսիսյանը Aravot.am-ի հետ զրույցում տեղեկացրեց քննարկման մանրամասներին: Հարցին՝ արդյոք արդյունավե°տ էր քննարկումը, Եղիա Ներսիսյանը պատասխանեց՝ «Ոչ լիարժեք»: Այնուհետև անդրադառնալով քննարկման մանրամասներին՝ նա նշեց. «Քննարկումից պարզ դարձավ, որ նախարարությունում ծանրութեթև են անում կիսակառույցի քանդել-չքանդելու հարցը: Ասում են, ի վերջո, մարդը ներդրում է կատարել, կիսակառույցը կանգնեցրել, քանդելու դեպքում փոխհատուցման խնդիր կառաջանա: Նախարարության ստեղծած միջգերատեսչական հանձնաժողովը մինչև սեպտեմբեր պետք է բանակցի շինարարությունն իրականացրած «Հովազաձոր» ընկերության հետ»: Մեր հարցին՝ իսկ ո°րն է բանակցելու անհրաժեշտությունը, եթե շինարարությունն այդ վայրում արգելված է, ուստի կիսակառույցը ապօրինի, Եղիա Ներսիսյանը պատասխանեց. «Մեզ՝ բնապահպաններիս մոտ էլ է այդ հարցը առաջանում…գործի ընթացքը ցույց կտա»:
Բնապահպան-ակտիվիստը մեզ տեղեկացրեց, որ քննարկման ժամանակ բարձրացվել է նաև Խոսրովի արգելոցում էկոտուրիզմի արգելման և արգելոցին արգելոցային ռեժիմին վերադարձնելու հարցը: Ըստ Եղիա Ներսիսյանի՝ բնապահպանության նախարարն այս հարցում համաձայնել է իրենց հետ՝ նշելով, որ նույնիսկ պետք է արգելոց մուտքն արգելվի անգամ տեղացիների համար, քանի որ այժմ՝ վճարելով 500 դրամ հնարավոր է մուտք գործել արգելոցի տարածք:
Կարդացեք նաև
Տաթև ՀԱՐՈՒԹՅՈՒՆՅԱՆ
Լուսանկարը՝ Լուսինե Գեւորգյանի
