Սևանա լճից հավելյալ ջրառի վերաբերյալ «կործանարար» օրինագծի կատարման ընթացքի մասին «Ժառանգություն» խմբակցության անդամ Զարուհի Փոստանջյանը կառավարությանն ուղղված պատգամավորական հարցմամբ հանդես կգա: Այդ մասին Panorama.am-ի թղթակցին տեղեկացրեց հենց Փոստանջյանը:
«Օրինագծի ընդունման անհրաժեշտությունը չկար և, կարծում եմ, որ կառավարությունը պետք է ողջամիտ գտնվի և դադարեցնի Սևանա լճից ջրի բաղցթողնման ծրագիրը»,- նկատեց տիկին Փոստանջյանը, որն օրենքի ընդունմանը դեմ էր: Նա տարակուսած է` երբ ամռանը երաշտ չի կանխատեսվել, երբ պարբերաբար հորդառատ անձրևներ են տեղում Հանրապետությունում, այդ ինչպես եղա՞վ, որ Սևանա լճի ջրի կարիքն զգացվեց:
Սևանա լճից հավելյալ 150 մլն խմ ջուր վերցնելու մասին օրենսդրական փաթեթը, չնայած խորհրդարանական ընդդիմության, ինչպես նաև մի խումբ բնապահպանների անհանգստություններին ու բարձրաձայնած մտահոգություններին, ընդունվել էր Ազգային ժողովում և հուլիսի 13-ին վավերացվել Հայաստանի նախագահի կողմից:
«Սևանա լճի մասին» և «Սևանա լճի էկոհամակարգի վերականգնման, պահպանման, վերարտադրման և օգտագործման միջոցառումների տարեկան և համալիր ծրագրերը հաստատելու մասին» ՀՀ օրենքներում լրացումներ կատարելու օրենքների նախագծերի փաթեթով առաջարկվում է Սևանից հավելյալ վերցնել 150 մլն խորանարդ մետր ջուր: Այդպիսով, Սևանա լճից ընդհանուր առմամբ, նախատեսվում է վերցնել մինչև 320 միլիոն խորանարդ մետր ջուր: Կառավարությունը, որպես օրենքում փոփոխություններ կատարելու պատճառաբանություն, հայտարարում էր, թե պետք է ոռոգել հանրապետության շուրջ 40 հազար հեկտար գյուղատնտեսական նշանակության հողատարածքներ:
Իսկ օրինագծի ընդդիմախոսների կարծիքով, մեծահարուստներն այդ օրինագծով փորձում են փրկել իրենց ափամերձ «վիլաները»:
