Հայաստանն այսօր Լոնդոնի օլիմպիական խաղերում մասնակից չունի: Սակայն հայ մարզասերներն անհամբերությամբ սպասում են վաղվան, երբ պայքարի մեջ կներգրավվեն մեր ծանրորդները:
«Բացումը» կանի 69 կգ քաշային Առաքել Միրզոյանը: Անձնական մարզիչ, օլիմպիական չեմպիոն Հոկսեն Միրզոյանի որդին այս քաշային կարգում մեդալների գլխավոր հավակնորդներից է ու հաջող մասնակցության դեպքում միանգամայն ի զորու է նաեւ ոսկի նվաճել: Հենց միայն այն, որ Առաքելը նախնական հայտարարել է երկամարտի 345 կիլոգրամ, որն ամենաբարձր քաշն է «A» խմբի մասնակից 14 ծանրորդների մեջ եւ ամբողջ 9 կիլոգրամով ավելի է ամենամոտ մրցակցի՝ ալբանացի Կալյա Բրիկենի նախնական պատվերից (ծանրորդների նախնական պատվերները հրապարակված են օլիմպիական խաղերի պաշտոնական կայքում), բոլորիս հույսեր է ներշնչում: Մնում է, որ Առաքելն առանց ավելորդ լարվածության եւ հուզմունքի մրցահարթակում անի այն, ինչը կատարել է մարզումների ժամանակ:
Վաղը ելույթ է ունենալու նաեւ «սպիտակ քարտով» օլիմպիական խաղեր մեկնած լողորդ Միքայել Քոլոյանը: Նա մասնակցելու է 100 մետր ազատ ոճով մրցմանը:
Աշոտ ՀԱԿՈԲՅԱՆ
