ՀՀ գյուղնախարար Սերգո Կարապետյանը ցանկություն է հայտնել կյանքի կոչելու դեռ անցյալ տարի Իրանում ստորագրած երկկողմ համագործակցության մասին փոխըմբռնման հուշագրի այն դրույթը, որը վերաբերում է Հայաստանում «Հալալ» մակնշմամբ սպանդանոց կառուցելուն:
ՀՀ գյուղնախարարության պաշտոնական կայքում միաժամանակ նշվում է, որ նախարարն այդ թեման բարձրացրել է նաև Հայաստանում ԻԻՀ նորանշանակ արտակարգ և լիազոր դեսպան Մոհամմադ Ռեիսիի հետ վերջերս կայացած հանդիպման ժամանակ:
Հայաստանի գործատուների հանրապետական միության ֆերմերների և կաշեգործների ճյուղային միության նախագահ Վոլոդյա Գալստյանը «Փաստինֆո» լրատվական գործակալության թղթակցին տեղեկացրեց, որ Հայաստանի բոլոր մարզերում այսօր անասունների մթերումն ու սպանդն իրականացվում են տարբեր թողունակություն և անհրաժեշտ տեխնիկական պայմաններ ունեցող 10 սպանդանոցներում: Նա տարակուսանք հայտնեց նոր սպանդանոց կառուցելու հարցի վերաբերյալ, քանի որ գործող նման հաստատություններն այսօր բավարարում են Հայաստանի շուկայի պանջարկը: Երևանում և մարզերում գործող նման հաստատությունները նա բաժանեց երկու` փոքր և միջին կարգի: Փոքրերի թողունակությունը կազմում է օրական մոտ 30, իսկ խոշորներինը` մինչև 100 գլուխ խոշոր եղջերավոր անասուն: Վոլոդյա Գալստյանը կարծիք հայտնեց, որ եկել է ժամանակը որպեսզի ընդունվի մի իրավական փաստաթուղթ բակերում կամ սանիտարական նորմատիվներին անհամապատասխան այլ վայրերում անասունների մորթն արգելելու և այդ գործընթացն ավելի կանոնակարգված կազմակերպելու համար:
«Փաստինֆո» լրատվական գործակալություն
Կարդացեք նաև
