Իջեւանի քաղաքապետարանը Աղստեւ գետի ափերին տեղակայված զանազան օբյեկտների տերերին զգուշացրել է` տարատեսակ աղբ չթափել գետ: Քաղաքապետարանին ենթակա կոմունալ ծառայության աշխատողների կողմից գետի ափերը մի քանի անգամ աղբից մաքրվել են: Սակայն գետափնյա սննդի եւ առեւտրի օբյեկտները շարունակում են աղտոտել Իջեւան քաղաքի զարդը համարվող Աղստեւը: Շատ դեպքերում ընտանի կենդանիների մորթը կատարվում է գետափին, կենդանիների գլուխներն ու ոտքերը Աղստեւ են նետվում: Միջազգային մի կազմակերպություն գետի ափին, ծառի վրա, փակցրել է «Աղստեւը դու ես» մակագրությամբ պաստառ, սակայն գետի աղտոտումը շարունակվում է: Աղստեւը տարատեսակ աղբով «հագեցած է», բայց ձկնորսության սիրահարներին դա չի վանում: Նրանք պղտոր ջրում ձուկ են որսում:
Ոսկան Սարգսյան
