Այսօր հոգեբանական գիտությունների դոկտոր Սամվել Խուդոյանը եւ սոցիոլոգ Ահարոն Ադիբեկյանը խոսեցին ազգային բնավորության, հոգեբանության, հայկական մենթալիտետի մասին:
Հոգեբանը նկատեց՝ ինչպես յուրաքանչյուր անհատ, ընտանիք, այնպես էլ ազգը իր պատմության ընթացքում ձեւավորում է պատկերացումների համակարգ: «Ձեւավորվում են այնպիսի պատկերացումներ, որոնք ազգային գիտակցության մեջ տպված են ու կարող են տանել նույնիսկ կործանման, կամ՝ նպաստել, որ այն զարգանա»,- ասաց Խուդոյանը, որի պատկերացումներով՝ հայ ազգը նույնպես ունի նման կողմեր, դրանցից է, օրինակ, հարմարվողականությունը, ինչն էլ եւ օգնում է, եւ խանգարում:
Ադիբեկյանն էլ իր կառուցվածքային պատկերացումներով կիսվելով՝ նշեց, որ Ճապոնիայի կառավարությունն ուզում է ստեղծել արհեստական մտածող մեքենա, ունենալ աշխարհում ամենաբարձր IQ-ն եւ որ դպրոցի շրջանավարտների 10-ից 9-ը կարողանա ուսումը շարունակել բուհում. «Խնդիրը մտային կարողությունների հզորացումն է: Այսինքն՝ այս ազգն իր հույսը դրել է ազգային մենթալիտետի հզորացման վրա, որպես ամենակարեւոր ռեսուրս: Ի դեպ, նշեմ, որ նրանք Հայաստանում չցանկացան ներդրումներ կատարել՝ պատճառաբանելով մեր մենթալիտետի ռեսուրսակլանող ու աճեցնող չլինելը: Այսինքն՝ Ճապոնիան լավագույն դեպքում մեզ կարող է մի քանի տրակտոր նվիրել: Բերեմ մի պարզ օրինակ, երբ մի հայ տեսնում է մեկը գրիլ է վաճառում, բերում՝ ինքն էլ է նրա կողքին գրիլ դնում, հետո երրորդն է ավելանում ու այդպես դառնում է գրիլի փողոց, իսկ ԱՄՆ-ում եթե մեկը հյութ է վաճառում, մյուսը համբուրգեր է դնում, այն երրորդը օղի, չորրորդն էլ գրենական պիտույքներ, եւ այդ ամենի արդյունքում ստացվում է փոքր ունիվերսամ»,- ասաց Ադիբեկյանը՝ շեշտելով, որ հայ ազգը կամազուրկ է: «Հաճախ մենք գլուխ ենք գովում, թե գրագետ ազգ ենք, բայց գիտելիքները 5 տարին մեկ արժեզրկվում եւ փոփոխվում են, իսկ հայը չի ուզում փոփոխվել, որովհետեւ դրա ունակությունը չունի»,-ավելացրեց Ադիբեկյանը:
Եվա ՀԱԿՈԲՅԱՆ
