«Շահերի պաշտպանության և աջակցության կենտրոնին» 2011-ի օգոստոսից մինչեւ այս տարվա հունիսը դիմել են 1580 քաղաքացի, դրանցից 176-ը կոռուպցիոն ռիսկ են պարունակել: Այս մասին այսօր «Հենարան» ակումբում ասաց կենտրոնի ղեկավար Մարատ Ատովմյանը:
Ըստ նրա, կոռուպցիոն ռիսկ պարունակող 42 գործերում կենտրոնի իրավաբանները դատարաններում հաջողության են հասել: Պարոն Ատովմյանի խոսքերով, քաղաքացիների հիմնական բողոքները քաղաքապետարանից, անշարժ գույքի կադաստրի պետական կոմիտեից, Ոստիկանության՝ անձնագրերի ու վիազաների վարչությունից, սոցիալական ապահովության մարմիններից են:
Կենտրոնի ղեկավարը զարմացել է, որ գրեթե բողոքներ չեն ստանում բուհերից ու առողջապահական ոլորտից: Իրենց դիմած քաղաքացիների հիմնական բողոքները վերաբերում են գերատեսչություններից անհասկանալի մերժումներին կամ օրենքով սահմանված ժամկետում պատասխան չստանալուն: Քաղաքացիները նաեւ պաշտոնյայի վատ վերաբերմունքից ու փաստաբանների անբարեխիղճ աշխատանքից են բողոքում: Կենտրոնի ղեկավարը բավարար չի գնահատում իշխանությունների պայքարը կոռուպցիայի դեմ ու կարծում է, որ միայն մարդկանց ձերբակալելն ու պատժելը հարցին լուծում չէ: Ըստ նրա, պայքարը ենթադրում է վարչաիրավական պատասխանատվության ու կարգապահական տույժերի ենթարկելու մեթոդը: Բայց նաեւ այն կարծիքին է, որ պաշտոնյաների ձերբակալությունները որոշ առումով նաեւ զսպող դեր կարող են ունենալ: Իսկ կոռուպցիայի դեմ պայքարելու արդյունավետ մեթոդներից էլ պարոն Ատովմյանը համարում է ապօրինի հարստացումը քրեականացնելու նախաձեռնությունը, ինչը, ըստ նրա, Հայաստանում դեռ խուսափում են նախաձեռնել:
Կարդացեք նաև
Արփինե ՍԻՄՈՆՅԱՆ
