Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավոր Մխիթար Պապոյանի նախագահությամբ «Մոսկվա» կինոթատրոնում 2010թ. հունվարի 10-ին տեղի ունեցած 5 մլն-ի գողության գործով այսօրվա դատաքննությունը շարունակվեց թիվ 5-րդ դահլիճում, քանի որ ամբաստանյալներից մեկի՝ Ստեփան Հովակիմյանի ինքնավնասման (նախաբազկի շրջանում սուր-ծակող գործիքով կտրել է) պատճառով ոստիկանությունը տեղազննություն էր անցկացնում թիվ 1-ում:
Դատավորը սանկցիա կիրառեց Ստեփան Հովակիմյանի նկատմամբ՝ 2 ժամով զրկելով նրան մասնակցել դատական նիստին: Հովակիմյանի պաշտպան Տիգրան Սաֆարյանը առարկեց, խնդրելով մինչեւ նիստը որպեսզի տեսակցի իր պաշտպանյալի հետ, ճշտի նրա դիրքորոշումը: Սակայն, քանի որ դատակոչված վկա, այս գործով մեղադրյալ Վահրամ Քերոբյանի մայրը՝ Ռուզաննա Քերոբյանը դեռ ցուցմունք չէր տվել, հետեւաբար Վահրամի պաշտպանական կողմը առարկեց, ասելով, որ վկայի ցուցմունքից հետո նա կարող է իր պաշտպանյալի դիրքորոշումը ճշտել:
Ռուզաննա Քերոբյանի սկանդալային հայտարարությունը փոխեց այս դատաքննության ընթացքը: Նա հայտնեց, որ իր որդու՝ Վահրամի հեռախոսազրույցները, որոնք ինքը լսել է, պարզել է, որ Վահրամը չի կատարել գողությունը: Նրան մի քանի անգամ զանգել է Ստեփանը, հոդորել գողության մասին, սակայն Վահրամն անջատել է հեռախոսը, իսկ երբ Ստեփանը նրան տվել է կինոթատրոնի դրամարկղի բանալին, Վահրամը մտել է կինոթատրոն, սակայն քիչ հետո դուրս գալով՝ նորից բանալին տվել է նրան, ասելով, որ չի կարող կատարել գողությունը:
Ռ. Քերոբյանը հրաժարվեց պատասխանել կողմերից որեւէ մեկի հարցերին: Իսկ Վահրամը դատախազ Սամվել Հարությունյանի այն հարցին, թե հավատում է իր մոր ցուցմունքին, նույնպես հրաժարվեց պատասխանել:
Կարդացեք նաև
Օրվա լարվածությունը հասավ իր գագաթնակետին, երբ Վահրամի պաշտպանը՝ ճանաչված փաստաբան Լուսինե Սահակյանը, միջնորդեց, որպեսզի փոխվի իր պաշտպանյալի խափանման միջոց կալանքը եւ նրա նկատմամբ կիրառվի այլընտրանքային խափանման միջոց՝ գրավի տեսքով: Իսկ Վահրամի մյուս պաշտպանը՝ Երվանդ Վարոսյանը խնդրեց, որ գումարի չափը լինի ողջամիտ:
Դատավոր Մխիթար Պապոյանը խորհրդակցական սենյակից դուրս գալուց հետո իր որոշմամբ փոխեց Վահրամ Քերոբյանի խափանման միջոցը՝ 500 հազար դրամի չափով գրավ կիրառելով: Գրավի գումարը մուծելուց հետո Վահրամը նույն պահին կազատվի ազատազրկման վայրից:
Ռուզան ՄԻՆԱՍՅԱՆ
Հ. Գ. Երեւան քաղաքի ավագ դատախազ Սամվել Հարությունյանին հարցրինք, թե արդյոք ինքը հարվածե՞լ է Ստեփան Հովակիմյանին, ինչպես պնդում է Ստեփանի հայրը: Նա չժխտեց եւ ասաց, որ հարվածել է այն ժամանակ, երբ խոսափողը ամբաստանյալը վերցրեց եւ ոտքով հարվածեց իրեն:
Ի դեպ, մենք հարվածելու պահը չէինք նկատել, որովհետեւ դահլիճում այդ պահին վատացել էր ամբաստանյալներից մեկի մորաքույրը, նրա մոտ սրտի ուժեղ նոպա էր սկսվել, մենք հազիվ կարողանում էինք տեսնել ոստիկաններին դիմադրող Ստեփանին:
Հաջորդ դատական նիստը նշանակվեց օգոստոսի 15-ին:
