ՀՀՇ վարչության փոխնախագահ Վահագն Հայոցյանը Aravot.am-ի հետ զրույցում Վանո Սիրադեղյանի թիկնազորի նախկին պետ Սուրեն Սիրունյանի պատմած դրվագի հետ կապված պատասխանեց ճիշտ այնպես, ինչպես ՀՀՇ վարչության նախագահ Արամ Մանուկյանը` «Սուտ է բացարձակ»:
Խոսքն այն դրվագի մասին է, ըստ որի, Սուրեն Սիրունյանի պատմելով, երբ գլխավոր դատախազն առաջին անգամ միջնորդել է ԱԺ-ում, որ Վանո Սիրադեղյանը ձերբակալվի, այն ժամանակ մշակույթի փոխնախարար Արամ Մանուկյանը մոտեցել է Վանո Սիրադեղյանին ու խնդրել, որ կամ ինքը չմասնակցի քվեարկությանը, կամ կողմ քվեարկի, որպեսզի չկորցնի իր պաշտոնը:
Այս առնչությամբ, Վահագն Հայոցյանը հերքելուց հետո, նա որպես ապացույց նշեց. «Կարող եք մտնել Ազգային ժողովի արխիվ ու տեսնել, որ Արամ Մանուկյանը շատ լուրջ ելույթ է ունեցել: Չէր կարող նման ելույթ ունեցողը կողմ քվեարկեր»:
Կարդացեք նաև
Մեր դիտարկմանը, որ ՀՀՇ վարչության նախկին անդամ Հովհաննես Ղազարյանը վստահեցնում է, որ դա հայտնի դեպք է եղել, եւ որ բոլոր ՀՀՇ-ականները գիտեն այդ պատմությունը` Վահագն Հայոցյանը պատասխանեց. «Հովհաննես Ղազարյանը Ազգային ժողովի հետ այնքան էր կապված, ինչքան ՀՀՇ-ն` Չինաստանի ֆուտբոլի ֆեդերացիայի հետ»:
Հռիփսիմե ՋԵԲԵՋՅԱՆ
