«Փաստինֆո» գործակալությունը հուլիսի 25-ին անդրադարձել էր վերջերս շրջանառության մեջ դրված Էմմիի և ֆրանսահայ երգիչ Եսայիի զուգերգի տեսահոլովակում (որը նկարահանվել է «Էրեբունի-Երևան» երգի հիման վրա, խոսքերի հեղ.՝ Պարույր Սևակ, երաժշտ. հեղ.՝ Էդգար Հովհաննիսյան) հեղինակների անվան նշման և օգտագործման թույլտվության վերաբերյալ Պարույր Սևակի ժառանգների հարցադրմանը և դրան ի պատասխան «Հայհեղինակ» հեղինակային իրավունքների պաշտպանության ՀԿ-ի տնօրեն Սուսաննա Ներսիսյանի պարզաբանմանը՝ հիմնված օրենքի վրա, որը թյուրըմբռնման տեղիք է տվել:
Այսօր անդրադառնալով թեմային՝ «Հայհեղինակ» հեղինակային իրավունքների պաշտպանության ՀԿ տնօրեն Սուսաննա Ներսիսյանը որոշակի հստակեցում մտցրեց այս հարցում, մասնավորապես նշելով. «Տեղի է ունեցել թյուրիմացություն. ես ոչ թե նշել եմ, որ Էմմին է խախտել իրավունքը, այլ դիտարկել եմ ընդհանրապես երևույթը՝ օրենքի շրջանակներում: Եթե երգի հեղինակների անունները ամրագրված չեն լինում (ինչպես նշում են ժառանգները), սա անձնական իրավունքի խախտում է: Սակայն պարզ դարձավ, որ տեսահոլովակի ներքո Պարույր Սևակի և Է. Հովհաննիսյանի անունները գրված են: Այսինքն՝ անձնական իրավունքի խախտում չկա: Երգիչը պարտականություն ունի հեղինակի նկատմամբ միայն այն մասով, որ չպետք է աղավաղի ստեղծագործությունը, փոխի նոտաները, այսինքն չխախտի անձնական իրավունքները: Բայց հեղինակների կողմից Էմմիի նկատմամբ ոչ մի բողոք չի եղել, ինչը նշանակում է ՝ Էմմին ընդհանրապես չի աղավաղում երգերը: Հակառակը՝ յուրովի կատարում է հեղինակների երաժշտական ստեղծագործությունը: Այս դեպքում ևս երգը չի աղավաղվել: Էմմին մեր կատարող-հեղինակն է: Կազմակերպությունը բավականին լավ համագործակցում է նրա հետ:
Ինչ վերաբերում է գույքային իրավունքի խախտմանը, ապա այս դեպքում պատասխանատուն ոչ թե կատարողն է (տվյալ դեպքում Էմմին և Եսային), այլ տեսահոլովակը պատրաստողը»:
Ըստ Ս. Ներսիսյանի՝ երգն օգտագործելու թույլտվություն երգի հեղինակների ժառանգներից պետք է ստանա տեսահոլովակի պատվիրատուն: Իսկ տեսահոլովակը, ինչպես հետո պարզվեց, Հանրային հեռուստաընկերության պատվերով է նկարահանվել: Այսինքն՝ Էմմին «Էրեբունի- Երևան» երգի հեղինակների գույքային իրավունքների նկատմամբ որևէ պարտավորություն չունի»:
Ս. Ներսիսյանի խոսքով՝ երգի հեղինակները «Հայհեղինակ» հեղինակային իրավունքների պաշտպանության ՀԿ-ի հետ կնքված պայմանագիր ունեն, որի հիման վրա կազմակերպությունը լիազորված է երգն օգտագործելու թույլտվությունը վարձատրության սկզբունքով տալ տեսահոլովակը նկարահանողին: Ընդ որում՝ վարձատրությունը նախատեսված է կառավարության որոշմամբ: «Ե՛վ Սևակի, և՛ Է. Հովհաննիսյանի ժառանգները կստանան հասանելիք վարձատրությունը»,- նշեց Ս. Ներսիսյանը:
