Տարեվերջին գյուղատնտեսության ոլորտում գյուղնախարար Սերգո Կարապետյանն այսօր կանխատեսեց 8-9 տոկոս աճ: Այսօր կառավարության նիստից հետո լրագրողների հետ հանդիպման ժամանակ գյուղնախարարն ասաց, որ ընթացիկ տարվա առաջին կիսամյակում այդ ոլորտում ՀՆԱ-ը կազմել է 203 միլիարդ 600 միլիոն դրամ , ինչը նախորդ տարվա նույն ժամանակահատվածի համեմատ՝ ավելի է 8,1 տոկոսով: Ըստ նրա, ամենամեծ աճը գրանցվել է բուսաբուծության ոլորտում՝ 28 տոկոս: Ձեռքբերումներ կան նաեւ անասնապահության ոլորտում: Այստեղ, ըստ նախարարի, 2 տոկոս աճ է գրանցվել. «Հատկապես բարձր է պտղաբուծության ոլորտում մեր ձեռքբերումները, եթե ամբողջ անցած տարի արտահանել ենք 7300 տոննա ծիրան, այսօրվա վիճակով արտահանվել է 12130 տոննա ծիրան: Եթե անցած ամբողջ տարի մթերվել է 2830 տոննա ծիրան, ապա այս տարի արդեն մթերվել է 6150 տոննա ծիրան»: Նախարարի գնահատմամբ՝ ծիրանից բացի, առատ է նաեւ խնձորի ու դեղձի բերքատվությունը, սպասելիքներ ունեն նաեւ խաղողի բերքատվությունից ՝ այս տարվա համար մոտ 6 տոկոսի աճ: Պարոն Կարապետյանն ասաց նաեւ, որ այս տարի, նախորդ տարվա համեմատ, 25,300 հեկտար ավելի ցանքատարածություններ են մշակվել:
Արփինե ՍԻՄՈՆՅԱՆ
Կարդացեք նաև
