Հուլիսի 24-ին Բերդ քաղաքում, Տավուշի մարզի առաջին ատյանի դատարանում, դատավոր Զոյա Զաքինյանի նախագահությամբ, կայացավ Իջեւանի գնդի նախկին հրամանատար, գնդապետ Սերգեյ Կարապետյանի եւ նույն գնդի գումարտակի նախկին հրամանատար Հրանտ Դալլաքյանի դատավարության հերթական նիստը: Հերթական անգամ դատական նիստին չէր ներկայացրել հոգեբան-փորձագետ Էլդա Գրինը: Դատարանից տեղեկացա, որ Էկդա Գրինը իր մեծ տարիքի եւ առողջական խնդիրների պատճառով չի կարողանում հաղթահարել Երեւան-Բերդ 206 կմ տարածությունը, որպեսզի մասնակցի դատական նիստին: Սերգեյ Կարապետյանի դատահոգեբուժական փորձաքննությունն իրականացրած 4 փորձագետներից մեկը` Էլդա Գրինը, ինչ-ինչ պատճառով դրա եզրակացության տակ չի ստորագրել: Ուստի դատարանը որոշել է հաջորդ` օգոստոսի 6-ի դատական նիստն անցկացնել Երեւանում, որպեսզի Էլդա Գրինը կարողանա դրան մասնակցել եւ հարցաքննվել: Այդ նիստում Էլդա Գրինին հարցեր կտրվեն, թե նա ինչու չի ստորագրել փորձաքննության եզրակացության տակ, արդյոք նա համաձա՞յն է այդ եզրակացության հետ, թե՞ ունի հատուկ կարծիք: Սույն դատավարությունը սկսվել է 2011թ. դեկտեմբերի 8-ին: Քրեական գործի պատմությունը հետեւյալն է. Իջեւանի տարածաշրջանից չորս երիտասարդներ 2010թ. դեկտեմբերի 31-ին՝ տարեմուտից մի ժամ առաջ, ջերմության դեմ դեղորայք են տարել իրենց ընկերներից մեկի եղբորը, ով վերոհիշյալ զորամասում է ծառայում: Նրանց հանդիպել է զորամասի հրամանատար, գնդապետ Սերգեյ Կարապետյանը: Վերջինս զայրացել է նրանց այցից, հրամանատարի եւ երիտասարդների միջեւ վեճ եւ ընդհարում է եղել: Կարապետյանը նրանց բերման է ենթարկել իր աշխատասենյակ, ահաբեկել նրանց: Ահաբեկված տղաները ցատկել են նրա աշխատասենյակի երկրորդ հարկից: Դրա հետեւանքով Իջեւանի Գետահովիտ գյուղի 20-ամյա բնակիչ Տարոն Ենգիբարյանը գլխի ծանր վնասվածքներ էր ստացել, իսկ 21-ամյա Աշոտ Ուլիխանյանը՝ ձախ ոտքի կոտրվածք: Տարոնին տեղափոխել էին Իջեւանի հիվանդանոց, ապա՝ Երեւանի «Սուրբ Գրիգոր Լուսավորիչ» բժշկական կենտրոն: 10 օր հետո, գիտակցության չգալով, Տարոն Ենգիբարյանը մահացել է:
Ոսկան Սարգսյան
