Հատված Ազգային ժողովում հանրապետության նախագահի մշտական ներկայացուցիչ ԳԱՌՆԻԿ ԻՍԱԳՈՒԼՅԱՆԻ հետ հարցազրույցից:
-Առաջիկա նախագահական ընտրություններում կարելի՞ է ակնկալել լուրջ մրցակցություն։
-Հայաստանում, իրոք, ընդդիմությունը չի կարողանում միասնական լինել, մեկ թեկնածու առաջադրել: Եվ ոչ մեկին դրա համար ընդդիմությունը չի կարող մեղադրել: Իշխանությանը մեղադրելը բացարձակապես անիմաստ է:
Պետության առջեւ ծառացած շատ խնդիրների լուծումները գործող նախագահը հստակ ձեւակերպում է: Գուցե նախագահի առաջարկած լուծումները շատերին դուր չեն գալիս, սակայն ընդդիմադիր ուժերը դրանք միայն մերժում են ու փոխարենը ոչինչ չեն առաջարկում: Ընդդիմությունը այլընտրանք չի ներկայացնում, իսկ դա նշանակում է, որ առաջիկա ընտրություններում գործող նախագահի շանսերը շատ ավելի նախընտրելի են, քան մյուսներինը:
Նոր սերունդը, երիտասարդությունը ցանկանում է լսել կոնկրետ խնդիրների հստակ լուծումներ, որպեսզի միանշանակ պատկերացնի, թե ինչ է սպասվում ապագայում եւ այդ ապագայում որն է լինելու իր տեղը: Այն քաղաքական ուժը, որը կարողանա այս լուծումները առավել ճշգրիտ ձեւակերպել ու ներկայացնել, նրան էլ կուղեկցի հաջողությունը ընտրությունների ժամանակ:
Իհարկե, որոշիչ նշանակություն կունենա նաեւ կուսակցական աշխատանքը: Հանրապետականը խորհրդարանական ընտրություններից հետո իր բոլոր շտաբները դարձրել է կուսակցական գրասենյակներ, վաղը դարձյալ վերածելու է նախընտրական շտաբների եւ շատ ավելի արդյունավետ է աշխատելու, քան մյուսները:
Այսօր ընդդիմադիր բոլոր կուսակցությունների շտաբները լուծարված են, սկզբնական կազմակերպությունները անդամալույծ են: Բնականաբար նրանք հաջողության հասնելու նվազ շանս ունեն: Ընդդիմությանը մնում է դարձյալ հին գործելաձեւը՝ իր 5-7 տոկոս քվեատուներին հանել փողոց եւ փորձել ստեղծել իշխանությունը փոխելու իրադրություն:
Իշխանությունն այս իրավիճակում ունի նման զարգացումները կանխելու սահմանադրական իրավունք: Եթե ընդդիմությունը մնա այս մակարդակում եւ նոր ոչինչ չձեռնարկի, առաջիկա նախագահական ընտրություններում գործող նախագահին այլընտրանք չի լինելու:
Գեւորգ ՀԱՐՈՒԹՅՈՒՆՅԱՆ
«Հայոց աշխարհ»
