Այսօր արդիական է Մարդու իրավունքների եվրոպական դատարանի վճիռներով պետության կողմից կատարված ծախսերը ռեգրեսիվ կարգով պաշտոնատար անձանցից գանձելու հստակ ընթացակարգեր ու մեխանիզմներ մշակելու խնդիրը: Այդ մասին «Փաստինֆո» լրատվական գործակալության թղթակցի հետ զրույցում նշեց ՀՀ արդարադատության փոխնախարար, ՄԻԵԴ-ում ՀՀ կառավարության փոխներկայացուցիչ Ռուբեն Մելիքյանը: Դրանց մշակմամբ հնարավոր կլինի գանձել այդ ծախսերն այն դեպքում, եթե իրոք առկա է կոպիտ խախտում:
Արդարադատության փոխնախարարը նշեց, որ ներկայումս ուսումնասիրվում է այլ երկրների փորձը, որպեսզի հանրությանը հուզող այդ արդիական խնդրին տրվեն գրագետ լուծումներ:
Ռ. Մելիքյանն ընդգծեց, որ հատկապես դատական իշխանության պարագայում կան շատ հստակ չափանիշներ, մասնավորապես, առ այն, որ դատարանը չի կարող պատասխանատվություն կրել այն գործողությունների համար, եթե դա իր մեջ դիտավորություն չի պարունակում:
ՀՀ արդարադատության փոխնախարարը նշեց նաև, որ Հայաստանը շուտով պատրաստվում է ստանձնել Եվրոպայի խորհրդի նախագահությունը, և այդ շրջանակներում կարող է վեր հանել այլ երկրների դրական փորձը և, ինչու չէ, օգտակար լինել նաև այլ երկրների: Փոխնախարարը կարևորում է, որպեսզի այդ հարցում մշակվեն միասնական չափանիշներ:
Կարդացեք նաև
Ռուբեն Մելիքյանը նշեց նաև, որ որոշ դեպքերում Հայաստանի դեմ վճիռներ են կայացվել համեմատաբար հին գործերով՝ դրանցում բարձրացված իրավական խնդիրներն արդեն իսկ լուծված են:
Այսպես, ՄԻԵԴ-ում 2012թ.եղել են վճիռներ, ըստ որոնց խախտում է ճանաչվել գործը դատարան ուղարկելիս անձի մինչդատական կալանքի ժամկետը կասեցնելու մասին օրենսդրական դրույթը մինչև դատարանի կողմից անձի խափանման միջոցի վերաբերյալ որոշման կայացումը նա պահվում էր անազատության մեջ ոչ թե դատարանի որոշման հիման վրա, այլ իրավունքի ուժով: Մի քանի տարի առաջ խնդիրն արդեն լուծվել է՝ դատական նախադեպի միջոցով:
Իսկ գործերից մեկով Եվրոդատարանը խախտում է ճանաչել դատարաններում ճաղավանդակների առկայությունը, մինչդեռ վաղուց դատարաններում ճաղավանդակներ չկան: «Մի քանի տարի առաջ եղած իրավական այդ խնդիրները հետապնդում են մեզ այսօր»,- ասաց Ռուբեն Մելիքյանը:
«Փաստինֆո» լրատվական գործակալություն
