ՀՀ ԱԺ փոխխոսնակ Էդուարդ Շարմազանովը՝ Գյումրու քաղաքապետի ընտրությունների եւ ՀՀ ԱԺ ընդդիմադիր խմբակցությունների հարցաշարի մասին:
– Նախօրեին խորհրդարանի երեք ընդդիմադիր խմբակցությունները՝ ՀԱԿ, ՀՅԴ, «Ժառանգություն», հրապարակեցին ՀՀ կառավարությանը եւ դատախազությանն ուղղված «Հարսնաքարի» գործով հարցաշարը: Ի՞նչ տպավորություն է թողել հարցաշարը Ձեզ վրա, որքանո՞վ է այն օգնելու համակողմանի եւ օբյեկտիվ քննություն իրականացնելուն՝ ինչպես ակնկալում են հեղինակները:
– Հարցաշարը շատ մանրակրկիտ չեմ ուսումնասիրել, բովանդակությանն էլ առանձնապես անդրադառնալ չեմ ցանկանում: Բայց եթե օրենքը խախտվում է, դրա համար պետությունն ունի Սահմանադրությամբ լիազորված մարմիններ, որոնց էլ իրավասություն է տրված օրինախախտին հարցեր տալու: Հայաստանում կա իրավապահ համակարգ, եւ ես չեմ կարծում, որ իրավապահ մարմիններին, իրենց գործի գիտակներին, որոնք երկար տարիների պրոֆեսիոնալներ են եւ իրականացնում են իրենց վրա դրված սահմանադրական պարտականությունները, ճիշտ է այս կամ այն քաղաքական կուսակցության ներկայացուցիչների կողմից այս կամ այն քրեական գործի քննության վերաբերյալ հարցաշար ներկայացնելը: Կա քննություն, կա նախաքննության գաղտնիության իրավունք, կան պրոֆեսիոնալներ. չեմ կարծում, որ անհրաժեշտություն կա, որ որեւէ քաղաքական կուսակցություն խառնվի իրավական խնդիրներին: Մանավանդ՝ իրեն իրավունքներ վերապահի խորհուրդներ տալու իրավապահներին: Ցանկացած ժողովրդավարական երկրում նոնսենս է, երբ քաղաքական կուսակցությունը, խախտելով իշխանությունների տարանջատման սկզբունքը, իրավապահ մարմիններին հարցաշար է ներկայացնում, թե ինչպես պետք է քննություն կատարել կամ ինչ հարցերի վրա պետք է ուշադրություն դարձնել:
Կարդացեք նաև
Մեր իրավապահ համակարգում, վստահ եմ, այնքան պրոֆեսիոնալներ կան, որոնք իրավասու են առանց քաղաքական կուսակցությունների կողմից հնչեցրած խորհուրդների՝ անաչառ քննություն իրականացնել: Սա իմ անձնական կարծիքն է՝ իբրեւ ՀՀ քաղաքացի:
– Ինչո՞ւ է Ձեզ վրդովեցնում այն հանգամանքը, որ պատգամավորներն օգտագործել են իրենց լիազորությունները եւ օրենքով իրենց վերապահված իրավունքը. հասարակական հնչեղություն ունեցող գործի հարցում փորձում են առավել համակողմանի եւ օբյեկտիվ քննության հասնել:
– Եթե որեւէ պատգամավոր ինձ փաստ ներկայացնի, որ «Հարսնաքարի» դեպքի հետ կապված իրավապահ մարմինները համակողմանի քննություն չեն վարում, հատուկ եւ ոչ օբյեկտիվ վերաբերմունք ունեն, հրապարակային չեն, թերացել են, գուցե այդ ժամանակ քննարկենք ձեր տված հարցը: Բայց քանի որ ենթադրություններով են առաջ շարժվում, այստեղ ես քաղաքական շոուի հոտ եմ առնում:
– Եթե խնդիրը չվերաբերեր, չառնչվեր ՀՀԿ-ական այնպիսի կարկառուն դեմքի, ինչպիսին Ռուբեն Հայրապետյանն է, Ձեր վրդովմունքը նույնչա՞փ կլիներ:
– Հավատացեք՝ ում ուզում է առնչվեր, իմ կարծիքը նույնը կլիներ: Իմ համոզմունքն է, որ իշխանությունների տարանջատման սկզբունքն ինչքան իրական լինի, այնքան ամեն ինչ հստակ կընթանա: Ցավով պետք է նշեմ, որ ընդդիմության որոշ ներկայացուցիչներ դեռեւս չեն գիտակցում, որ իրավապահ մարմինները, դատական իշխանությունը չպետք է խառնել քաղաքական գործընթացների, քաղաքական ամբիցիաների կամ քաղաքական սիմպատիաների ու անտիպատիաների հետ:
– ՀՀԿ փոխնախագահ Գալուստ Սահակյանը երեկ «Ազատություն» ռադիոկայանին ասել էր, որ ՀՀԿ-ում քննարկվում է Գյումրու քաղաքապետի պաշտոնում ԲՀԿ առաջադրած թեկնածուին պաշտպանելու հարցը: Ինչպե՞ս կբացատրեք դա:
– ՀՀԿ-ն դեռեւս որոշում չունի Գյումրու քաղաքապետի հետ կապված: Երբ քննարկումները կավարտվեն, կլինի վերջնական քաղաքական որոշում, այն ժամանակ էլ դրա մասին կտեղեկացնենք: Քանի դեռ գործադիր մարմնի որոշում չկա, ես ձեռնպահ կմնամ մեկնաբանություններ անելուց, չնայած ունեմ իմ անձնական կարծիքն այդ հարցի վերաբերյալ: Բոլորին հորդորում եմ զերծ մնալ մեկնաբանություններից, եւ քանի դեռ չկա պաշտոնական որոշում՝ ՀՀԿ-ի փոխարեն դատողություններ չանել:
– Գալուստ Սահակյանի հայտարարությունն իր անձնական ցանկությո՞ւնն է:
– Գալուստ Գրիգորիչը փորձառու քաղաքական գործիչ է, Գալուստ Գրիգորիչը կարողանում է կանխատեսել ապագան:
– Փաստորեն, կանխատեսել է…
– Ես իր փոխարեն չեմ կարող պատասխանել: Չհերքելով Գալուստ Գրիգորիչի արտահայտած տեսակետի՝ կյանքի կոչվելու հավանականությունը, որպես կուսակցության խոսնակ՝ ձեռնպահ կմնամ որեւէ պաշտոնական մեկնաբանությունից, քանի դեռ կուսակցության գործադիր մարմինը պաշտոնական որոշում չունի:
– Գյումրու քաղաքապետի հարցում ո՞րն է Ձեր անձնական կարծիքը. ասացիք, որ այդ հարցում ունեք անձնական կարծիք:
– Անձնական սիմպատիաները կարող են լինել միջանձնային, ընկերական հարաբերություններից մինչեւ մարդու իրականացրած գործունեություն, հետեւաբար, ես իմ անձնական սիմպատիաները պահում եմ իմ մեջ՝ միջանձնային եւ մարդկային հարաբերությունների համար:
ՆԵԼԼԻ ԳՐԻԳՈՐՅԱՆ
«Առավոտ» օրաթերթ
