Դատավոր Ռուբեն Ափինյանի նախագահությամբ այսօր Կենտրոն եւ Նորք-Մարաշ վարչական շրջանների ընդհանուր իրավասության դատարանում սկսվեց «Հելսինկյան քաղաքացիական ասամբլեա Վանաձորի գրասենյակ» իրավապաշտպան կազմակերպության նախագահ Արթուր Սաքունցի հայցն ընդդեմ ֆուտբոլի ֆեդերացիայի նախագահ Ռուբեն Հայրապետյանի նախնական դատական նիստը:
Ա. Սաքունցի ներկայացուցիչն էր ՀՀ փաստաբանների պալատի անդամ, Վանաձորի ճանաչված փաստաբան Կարեն Թումանյանը: Ռուբեն Հայրապետյանի ներկայացուցիչն էր ՀՀ փաստաբանների պալատի անդամ, փաստաբան Լուսինե Բաղումյանը: Ի դեպ, իբրեւ պատասխանող էր ճանաչվել նաեւ ՀՀ հանրային հեռուստաընկերությունը, որը ներկայացնում էր իրավաբանական բաժնի պետ Արմեն Բաղդասարյանը:
Հայցվորը պահանջում է, որպեսզի Ռուբեն Հայրապետյանը հրապարակային ներողություն խնդրի, իսկ իր պատվին, արժանապատվությանը հասցրած վնասի համար հատուցի 1 լումա: Նկատենք, որ հայցի փոփոխություն էր տեղի ունեցել, քանի որ մինչ այդ Սաքունցը պահանջել էր 10 դրամի փոխհատուցում: Իսկ երբ դատավոր Ափինյանը հարցրեց՝ բարոյական տեսակետից ինչպիսի՞ն է փոխհատուցումը, հայցվորի ներկայացուցիչը պատասխանեց. «Դատարանը կտա այդ հարցի պատասխանը»:
Կարդացեք նաև
«Լրացուցիչ ժամանակ» սպորտային հաղորդման ժամանակ Ռ. Հայրապետյանը ասել էր «Հելսինկյաններից մի հատ անհասկանալի օղերով շան ծնունդ…» արտահայտությունը, եւ ապացուցման բեռը, որ դա ուղղված է Սաքունցին, պետք է կրի հայցվոր կողմը:
Այս կապակցությամբ Կարեն Թումանյանը հայտնեց, որ 14 օրվա ժամկետ է անհրաժեշտ, որպեսզի հաղորդմանը ներկա գտնված անձանց որպես վկա միջնորդեն իրենք դատարան գալու եւ ապացուցելու, որ վիրավորական արտահայտությունը վերաբերում է հայցվորին:
Ռուբեն Հայրապետյանի ներկայացուցիչը իրենց պատասխանը ներկայացրել էր դատարան, որտեղ նշված է, թե իրենց տեղեկություններով՝ «Սաքունցը ոչ մի անգամ օղեր չի կրել»: Երբ Կ. Թումանյանը հարց ուղղեց, թե այդ դեպքում Հայրապետյանը մենախոսե՞լ է, ո՞ւմ է ուղղված եղել խոսքը, հետեւեց Հայրապետյանի ներկայացուցչի պատասխանը. «Ես գուշակություններ անել չեմ կարող»: Մինչդեռ Կարեն Թումանյանը ակնարկեց, թե այդ պատասխանից կարող էր կողմի փոփոխություն տեղի ունենալ:
Հաջորդ նախնական դատական նիստը նշանակվեց օգոստոսի 8-ին, ժամը 13.30-ին:
Ռուզան ՄԻՆԱՍՅԱՆ
