Սամվել Բալասանյան
Գյումրիի քաղաքապետի ընտրություններում Հայաստանի հանրապետական կուսակցությունը (ՀՀԿ) կսատարի «Բարգավաճ Հայաստան» կուսակցության (ԲՀԿ) ներկայացուցիչ Սամվել Բալասանյանին: Այս մասին երեքշաբթի օրը «Ազատություն» ռադիոկայանի հետ զրույցում ասաց ՀՀԿ-ի փոխնախագահ Գալուստ Սահակյանը:
Թեեւ այդ որոշման պաշտոնական ձեւակերպումը չկա, բայց այս պահին իշխող կուսակցությունում քննարկում են ինչ ձեւով ներկայացնել իրենց որոշումը. Բալասանյանին իրենք առաջադրեն որպես թեկնածու, թե՞ ուղղակի հանդես գան ի պաշտպանություն ԲՀԿ-ի թեկնածուի:
«Երբ ասում ենք, որ մենք դրական ենք գնահատում Բալասանյանի թեկնածությունը, բնականաբար, մենք կամ կառաջարկենք կամ կպաշտպանենք Բալասանյանի թեկնածությունը: Խնդիրը այստեղ վերաբերում է նրան, թե ինչպիսի արձանագրումով ներկայանալ հանրությանը, որ ավելի օգտավետ լինի հենց Բալասանյանի համար», – մանրամասնեց Սահակյանը:
ՀՀԿ-ն Գյումրիում շատ արժանի կուսակիցներ ունի, որոնք կարող են դառնալ քաղաքապետ, ասում է Սահակյանը: Հարցին, այդ դեպքում ինչո՞ւ Բալասանյանը, նա պատասխանեց. – «Այն ծրագրերը, որոնք առկա են Գյումրիում քաղաքաշինության եւ քաղաքի մակարդակներով, գտնում ենք, որ Սամվել Բալասանյանը բավականին փորձառու է այդ իմաստով` եւ որպես բաժնետիրական ընկերության մասնակից, եւ որպես պատգամավոր. առավել եւս, կարծում եմ, որ այն համակիրները, որոնք կունենա ինքը, բավականին լուրջ ներդրումային ծրագրեր կիրականացնեն Գյումրիում, եւ սա է հիմնականում վերլուծությունը»:
Կարդացեք նաև
ՀՀԿ-ի փոխնախագահը հայտարարեց` Վարդան Ղուկասյանը վատ քաղաքապետ չէր, բայց ՀՀԿ-ն նրան չի սատարի:
«Խորհրդարանական ընտրություններում մենք Գյումրիում մեր սպասելիքներից բավականին քիչ ձայներ հավաքեցինք. մասամբ նաեւ սա է վերլուծվում, որովհետեւ եթե քաղաքականության մեջ ես, ապա պարտությունները, ձախողումները կամ անարդյունավետությունները շատ հաճախ չեն ներվում, դա է քաղաքական ստրուկտուրան: Իրողություններ են տեղի ունեցել, նաեւ այն աղմուկները` ճիշտ, թե սխալ, որ կապված են եղել Ղուկասյան ընտանիքի կամ Վարդան Ղուկասյանի հետ, ժողովրդի մեջ բավականին աժիոտաժ են առաջացրել, եւ կարծում եմ, այստեղ պիտի իր հրամայականը ունենա նաեւ ժողովուրդը», – ասաց նա:
Աստղիկ Բեդեւյան
