«Ազատ դեմոկրատներ» կուսակցության փոխնախագահ Անուշ Սեդրակյանն այն կարծիքին է, որ Հայաստանը մանր քայլերով դեպի ծպտյալ ժողովրդավարություն է գնում: «Գիտե՞ք, որն է ծպտյալ ժողովրդավարությունը, երբ որ փորձում ես կիսատ-պռատ ռեֆորմներով դաշտից հանել առավելագույնս վարկաբեկված անհատներին, Ռուբեն Հայրապետյանին, ինձ թվում է՝ Սամվել Ալեքսանյանն է հերթի, եթե ինքը լուռ չմնա, իսկ ինքը շատ իմաստնաբար լռում է: Վարդան Ղուկասյանը… բացարձակ վարկաբեկված մարդիկ են»,- այսօր «Հայելի» ակումբում ասաց տիկին Սեդրակյանը: Ասուլիսին ներկա ԱԺ ՀՀԿ պատգամավոր Մարգարիտ Եսայանն էլ հարցրեց՝ ինչ որ բան գաղտնի՞ է կատարվում .«Ամեն ինչ հրապարակի վրա է, բնական գործընթացներ են… Պետք չէ ցանկացած գործընթացում մեղադրել այս կամ այն քաղաքական ուժի, իմ կարծիքով, այսօրվանից ավելի բացահայտ ու հրապարակային գործունեություն՝ թե ընդդիմության թե իշխանության դաշտում, չենք տեսել, ամեն ինչ հրապարակային է՝ բոլորիս ափի մեջ»: Տիկին Սեդրակյանն էլ հակադարձեց. «Գիտե՞ք՝ ինչ է կատարվում Հայաստանում, մարդիկ վերջնականապես ուզում են դուրս գրվել Հայաստանից, որ գնան բնակվեն այլ երկրներում, վախենում եմ, որ ժողովուրդ չմնա Հայաստանում: Անձնագրային սեղաններում նրանց դուրս չեն գրում, ձգում են մինչեւ առավելագույնը, այսինքն հիմա խնդիր կա գոնե թղթի վրա կասեցնել էմիգրացիոն բումը»:
Բանախոսներն անդրադարձան նաեւ ՏԻՄ ընտրություններին: Տիկին Եսայանի համար իրադարձությունները նորմալ բնականոն հունով են ընթանում.«Որեւէ արտառոց կամ անսպասելի իրադարձություններ չեն կատարվում, չեն կատարվի»: Գյումրիի քաղաքապետի փոփոխությունների առնչությամբ էլ խորհուրդ տվեց չշտապել ու քանի դեռ թեկնածուներ չեն առաջադրվել, չշտապել ենթադրություններ անելու՝ որին որ քաղաքական ուժն է սատարելու:
Տիկին Սեդրակյանն էլ ասաց, որ փորձում են ցույց տալ, թե ամեն ինչ բնականոն է ու օրենքի շրջանակներում. «Իշխանությունն այնքան երկար ժամանակ է եղել բաժանումների, պայմանավորվածությունների ու տարբեր տիպի գաղտնի գործարքների դաշտ, որ երբ փորձում են գաղտնի գործարքից իշխանությունը հանել ու դուրս բերել բնականոն ընտրական ոլորտ, միանգամից պայթում է հայկական գավառական օրենսդրական մթնոլորտի չընդունելու տարբերակը»:
Արփինե ՍԻՄՈՆՅԱՆ
