Այս օրերին «Ժառանգության» ներկայացուցիչների ու ՀԱԿ-ի ներկայացուցիչների միջեւ բանավեճ է ընթանում՝ ո՞վ է ավելի խարիզմատիկ թեկնածու՝ Լեւոն Տեր-Պետրոսյա՞նը, թե՞ Րաֆֆի Հովհաննիսյանը: Այսօր «Փաստարկ» ակումբում Aravot.am-ը «Ժառանգություն» կուսակցության անդամ Ստյոպա Սաֆարյանից այդ առնչությամբ հետաքրքրվեց՝ Դուք է՞լ եք Արմեն Մարտիրոսյանի նման կարծում, որ 2008-ից հետո Տեր-Պետրոսյանը կորցրել է իր խարիզման եւ դաշտում ամենախարիզմատիկ թեկնածուն նախագահական ընտրությունների համար մնացել է Րաֆֆի Հովհաննիսյանը. պարոն Սաֆարյանը պատասխանեց. «Իրականության մեջ որեւէ մեկն իր խարիզման չի կորցրել կամ չի ավելացրել: Հայ հասարակությունը, ուզենք թե չուզենք, չի սիրում պարտված քաղաքական գործչի, կարող է զորակցել, բայց պարտվողին չի սիրում: Վերջին 20-ամյա զարգացումները ցույց են տալիս, որ Հայաստանի հասարակությունը ցանկացած քաղաքական գործչի մեկ ընտրափուլի ընթացքում ընդամենը մեկ անգամ է շանս տալիս: Չի եղել մի դեպք, որ մի քաղաքական գործիչը նույն ֆուրորով մասնակցի երկրորդ անգամ: Այս առումով կարող եմ համաձայնել Արմեն Մարտիրոսյանի ասածին՝ խոշոր հաշվով հաղթանակի չհասնելը խնդիր է դարձել Տեր-Պետրոսյանի համար: Հասարակությունը երկրորդ անգամ նրան չի դիտարկի՝ որպես ֆավորիտ: Վազգեն Մանուկյանը ֆավորիտ չէր 96-ից հետո, Ստեփան Դեմիրճյանը ֆավորիտ չէր: Հայաստանի հասարակությունը երկրորդ անգամ պարտված թեկնածուին երկրորդ շանս չի տալիս»:
Հռիփսիմե ՋԵԲԵՋՅԱՆ
