Հատված «Օրինաց երկիր» կուսակցության փոխնախագահ, ՕԵԿ խորհրդարանական խմբակցության քարտուղար ՄՀԵՐ ՇԱՀԳԵԼԴՅԱՆԻ հետ հարցազրույցից:
– «Օրինաց երկիր» կուսակցության վերակազմավորումը ի՞նչ փուլում է:
-Ներկուսակցական բարեփոխումները դեռ ընթացքի մեջ են: Առաջիկայում այս գործընթացը կավարտվի, եւ արդյունքները կամփոփենք: Մենք մի քանի խնդիրներ ենք լուծում: Ե՛վ կուսակցությանը անդամագրվելու գործընթացն ենք ավելի խիստ կանոնակարգում, ե՛ւ տարածքային սկզբնական մարմինները ձեւավորելու մեխանիզմն ենք հստակեցնում, եւ կուսակցական շարքերը մշտապես ֆիլտրելու հրամայական անհրաժեշտությունն ենք հաշվի առնում:
-Առաջիկա նախագահական ընտրությունների ժամանակ Սերժ Սարգսյանի թեկնածությունը պաշտպանելու մասին կոալիցիոն հայտարարագրի դրույթից ստորագրածներից ոչ մեկը չի հրաժարվել: Սա նշանակո՞ւմ է, որ ՀՀԿ-ն, ՕԵԿ-ը եւ ԲՀԿ-ն հիմա էլ միասնական դիրքորոշում ունեն այս հարցում:
-Իրոք, երեք քաղաքական ուժեր՝ ՀՀԿ-ն, ՕԵԿ-ը եւ ԲՀԿ-ն, ստորագրել են կոալիցիոն այդ համաձայնագիրը, եւ այն առ այսօր ուժի մեջ է:
ՕԵԿ-ը հավատարիմ է մնում իր որոշումներին: ԲՀԿ-ն ինքը պետք է հստակեցնի իր դիրքորոշումը: Սեպտեմբերին քաղաքական կյանքը կակտիվանա, եւ բոլոր քաղաքական ուժերը, այսպես թե այնպես, կհստակեցնեն իրենց կեցվածքը, քանի որ առջեւում նախագահական ընտրություններ են:
Գեւորգ ՀԱՐՈՒԹՅՈՒՆՅԱՆ
«Հայոց աշխարհ»
