Այսօր «Արմենիա-Մարիոթ» հյուրանոցի «Տիգրան Մեծ» սրահում առավոտյան ժ.10-ից սկսած քննարկվում է «Հայաստանի Հանրապետության իրավական եւ դատական բարեփոխումների 2012-2016թթ.ռազմավարական ծրագիրը»: Բացման խոսքով հանդես եկած ՀՀ արդարադատության նախարար Հրայր Թովմասյանն ասաց, թե չի հիշում մի միջոցառում, որտեղ նախարարն իր 4 տեղակալներով մասնակցի:
Նախարարը տեղեկացրեց, որ այս ծրագիրը մշակվել է արդարադատության նախարարության կողմից, ապա ներկայացվել ՀՀ նախագահին, Ազգային ժողով: Այսինքն, հանրային լսումներ, քաղաքացիական հասարակության կողմից քննարկումներ դեռ չէին եղել:
ՀՀ նախագահի օգնական Գեորգի Կուտոյանը, որը Հրայր Թովմասյանի տեղեկացմամբ, այս ծրագրի «կնքահայրն է», նշեց, որ այս ծրագրով իրավական նոր մշակույթի հիմքը դրվեց: Ըստ բանախոսի, 4 տարվա համար գործող ծրագիրը հիմք կդնի հակակոռուպցիոն նախադրյալների ստեղծմանը, դատական համակարգի ինքնակառավարմանն ու օբյեկտիվ գնահատման համակարգի ձեւավորմանը:
Կարդացեք նաև
Բանախոս, ՀՀ արդարադատության նախարարի առաջին տեղակալ Գրիգոր Մուրադյանը ներկայացրեց դատական համակարգի փոփոխություններին: Նախատեսվում է Արդարադատության խորհրդում դատավորների թեկնածությունների ցուցակում ընդգրկելու համար առաջադրման օբյեկտիվ ընթացակարգեր, հարցազրույցի կարգը, օրենքով հստակեցնել դատավորների առաջխաղացման չափանիշները: Ի դեպ, ծրագրով առաջարկվում է կարգապահական վարույթը, որն իրականացվում է դատավորի նկատմամբ, դիտարկել որպես նոր երեւան եկած հանգամանք եւ դրանով թույլ տալ կողմին դիմել դատարան՝ իր գործի վերանայման պահանջով:
Բանախոսն անդրադարձավ նաեւ դատարանների նախագահների խորհրդին, եւ ասաց, որ դա չպետք է դիտվի ուռճացված հաստիք եւ նախատեսվում է, որ յուրաքանչյուր դատավոր կարող է դատարանի նախագահ դառնալ:
Դատական դեպարտամենտի ներկայացուցիչ տիկին Կարապետյանի այն դիտարկմանն էլ, թե լավ դատավորը հնարավոր է իր կազմակերպչական ունակություններով չկարողանա լավ նախագահ լինել, մնաց առկախ:
Գրիգոր Մուրադյանը տեղեկացրեց նաեւ, որ դատավորների էթիկայի եւ կարգապահական հանձնաժողովները միավորվելու են, էթիկայի հանձնաժողովը դուրս է գալու դատարանների նախագահների խորհրդի կազմից:
Քննարկմանը մասնակից դիտորդներից մեկը նկատեց, որ ծրագրում խոսք է գնում փաստաբանական համակարգի, մասնավորապես, հանրային պաշտպանի ինստիտուտի, դատախազության, նոտարիատի, քրեակատարողական համակարգի մասին, մինչդեռ խոսք չկա դատական ակտերի հարկադիր կատարման մասին:
Իրավապաշտպան Ավետիք Իշխանյանը գտնում էր, որ ՀՀ նախագահի ստորագրությունը պետք է լինի ձեւական՝ դատավորների նշանակման, առաջխաղացման ժամանակ. «Բարեփոխումների ծրագիրն արդյունավետ կլիներ, եթե օրենսդրությունից հանվեին այն դրույթները, համաձայն որոնց նախագահն է ընտրում կամ նշանակում դատավորներ՝ առաջխաղացման ցուցակի համար, այսինքն, ազդեցություն չլիներ դատական իշխանության վրա: Այս ծրագիրը կոսմետիկ բնույթ է կրում, եւ չի լուծում հիմնահարցը.դատական համակարգը մնում է համակարգ, այլ ոչ թե՝ իշխանություն»:
Ռուզան ՄԻՆԱՍՅԱՆ
