Երեկ Լոնդոնում Իրանի ԱՕԿ գլխավոր քարտուղար Բահրամ Աֆշարզադեն հայտարարել է, թե այս օլիմպիական խաղրում իրանցի օլիմպիականները չեն հրաժարվի իսրայելցիների հետ պայքարելուց, ինչպես պատահել է Աթենքում եւ Պեկինում: Այս մասին տեղեկացնում են երկու երկրների ԶԼՄ-ները եւ «Associated Press» գործակալությունը: Այսպես, Իրանը հաստատել է Խաղերի ժամանակ թշնամության եւ պատերազմների մասին մոռանալու իր պատրաստակամությունը:
Աֆշարզադեն հայտարարել է նաեւ, որ եթե ՄՕԿ-ը որոշեր մեկ րոպե լռությամբ հարգել Մյունխենի օլիմպիական խաղերում կատարված ահաբեկչության զոհերի հիշատակը, Իրանը կմիանար համընդհանուր սգին:
Չնայած այն բանին, որ Իրանն Իսրայելի եւ Մեծ Բրիտանիայի հետ դիվանագիտական հարաբերություններ չունի, Աֆշարզադեն իր հիացմունքն է արտահայտել Խաղերի նախապատրաստության ընթացքում բրիտանացիների կատարած աշխատանքից:
Աշոտ ՀԱԿՈԲՅԱՆ
