Լեռնային Ղարաբաղի Հանրապետության նախագահի հուլիսի 19-ի ընտրության արդյունքում այդ պաշտոնում վերընտրված Բակո Սահակյանի պաշտոնամուտի արարողությունը տեղի կունենա սեպտեմբերի 7-ին:
ԼՂՀ սահմանադրության համաձայն, լիազորությունների 5 տարի ժամկետով ընտրված Հանրապետության նախագահը պաշտոնը ստանձնում է Հանրապետության նախորդ նախագահի լիազորությունների ավարտման օրը: Բ.Սահակյանը նախորդ անգամ ԼՂՀ նախագահի պաշտոնը ստանձնել է 2007թ.-ի սեպտեմբերի 7-ին:
Սահմանադրությամբ ամրագրված է նաև, որ ԼՂՀ նախագահը պաշտոնը ստանձնում է օրենքով սահմանված կարգով` Ազգային ժողովի հատուկ նիստում, ժողովրդին տրված հետևյալ երդմամբ. «Ստանձնելով Լեռնային Ղարաբաղի Հանրապետության Նախագահի պաշտոնը` երդվում եմ. անվերապահորեն կատարել Սահմանադրության պահանջները` հարգել մարդու և քաղաքացու իրավունքներն ու ազատությունները, ապահովել Հանրապետության ինքնիշխանությունը, անկախությունը, տարածքային ամբողջականությունը և անվտանգությունը` ի փառս Լեռնային Ղարաբաղի Հանրապետության և ի բարօրություն մեր ժողովրդի»:
ԱԺ 2007թ.-ի հատուկ նիստում Բակո Սահակյանը երդում է տվել ժողովրդին XVII դարի Արցախյան Ավետարանի և ԼՂՀ Սահմանադրության բնօրինակի վրա:
Կարդացեք նաև
«Փաստինֆո» լրատվական գործակալություն
