Փորձեցինք պարզել, թե մյուս կուսակցությունները թեկնածուներ ունենալո՞ւ են Գյումրիում։ «Ժառանգություն» կուսակցության պատգամավոր Զարուհի Փոստանջյանն ասաց. «Կուսակցության ներսում, ինչպես նաեւ տեղական կառույցում քննարկում ենք հարցը, բայց դեռ վերջնական որոշում չկա, երբ որ ունենանք, կհրապարակենք՝ կիմանաք»։
Եթե «Ժառանգությունում» այս հարցի քննարկումը գոնե սկսվել է, ապա ԲՀԿ-ի ռազմավարական դաշնակիցներ ՀՅԴ-ում եւ Հայ ազգային կոնգրեսում այն չի էլ քննարկվում։ Ամեն դեպքում, ՀՅԴ ԳՄ անդամ Սպարտակ Սեյրանյանը մեզ այդպես ասաց։ Մեր դիտարկմանը, թե հնարավո՞ր է սատարեն Բալասանյանին, Սեյրանյանը կրկնեց նույն պատասխանը։
ՀԱԿ առաջնորդ Լեւոն Տեր-Պետրոսյանի մամլո խոսնակ Արման Մուսինյանը եւս հավաստիացրեց, որ որեւէ քննարկում չեն սկսել. «Երբ որ մենք կամփոփենք քննարկումները եւ կկայացնենք որոշում, այդ մասին տեղյակ կպահենք հասարակությանը»։ Ըստ Մուսինյանի՝ Բալասանյանին պաշտպանելու հարցն էլ չի շոշափվել։
Պարզվում է՝ իշխող կուսակցությունում եւս հստակ որոշում չկա։ Գալուստ Սահակյանը փորձում էր վստահեցնել, թե իրենք անգամ թեկնածուի առաջադրվելու հարց չեն քննարկում, մինչդեռ, շրջանառվող լուրերի համաձայն, Սամվել Բալասանյանն արդեն ստացել է Սերժ Սարգսյանի «դաբրոն» եւ ինքն էլ կդառնա Վարդան Ղուկասյանի իրավահաջորդը: Զրուցեցինք ՀՀԿ փոխնախագահի հետ։
Կարդացեք նաև
– Պարոն Սահակյան, Գյումրիի քաղաքապետի ընտրությունն ինչո՞ւ կանգ առավ ԲՀԿ-ական Բալասանյանի թեկնածության վրա, ինչո՞ւ նախագահականի «դաբրոն» ընդդիմություն հռչակված ԲՀԿ-ի թեկնածուին տրվեց։
– Ճիշտ հարց չեք տալիս, ենթադրական հարց եք տալիս, ես նման դաբրոների ինֆորմացիա չունեմ։
– Բացառո՞ւմ եք, որ Բալասանյանը նախագահի հովանավորությունն ստացել է։
– Ես ինֆորմատո՛ր եմ, ինչ եմ, որ բացառեմ կամ չբացառեմ։ Ընդամենը «Բարգավաճն» է ասել, որ թեկնածու ունի, մենք առայժմ դրական ենք մոտենում։
Գայանե ՍԱՐԻԲԵԿՅԱՆ
«Հրապարակ»
