Փալուուն. «Առկա են բազմաթիվ հիմքեր, որոնց պատճառով այս օրինագիծը պետք է տապալվի»
Միացյալ Նահանգների Ներկայացուցիչների պալատի երկու կուսակցությունները մերժել են «2011 թվականի Բնիկ հնդկացի ցեղերի հետ առևտրի և ներդրումների ցուցադրական նախագծի մասին» թիվ 2362 բանաձևի հաստատումը, որով նախատեսվում էր թուրքական ընկերություններին Ամերիկայի հնդկացի ցեղերին պատկանող հողերում ներդրումներ կատարելու մենաշնորհային դիրք շնորհել:
Այս օրինագիծը, Ամերիկայի հայկական համագումարի կողմից տարածված մամուլի հաղորդագրության համաձայն, չի ստացել ընդունվելու համար անհրաժեշտ երկու երրորդ մեծամասնությունը:
Օրինագծին կողմ քվեարկել է 222, դեմ՝ 160 կոնգրեսական:
Կարդացեք նաև
Հայկական հարցերով կոնգրեսական հանձնախմբի համանախագահ, կոնգրեսական Ֆրենք Փալոունը, հայտնելով բնիկ հնդկացի ցեղերի երկրում տնտեսական բարգավաճում հաստատելու ջանքերին իր աջակցության մասին, նշեց օրինագծի նկատմամբ իր խիստ բացասական վերաբերմունքի մասին:
«Պարզ ասած՝ նման օրինագծի ընդունման համար գոյություն չունի որևէ ծանրակշիռ պատճառ: Իրականում, առկա են բազմաթիվ հիմքեր, որոնց պատճառով այս օրինագիծը պետք է տապալվի», – ասել է Փալոունը:
Մեջբերելով բազմաթիվ մտահոգություններ, ներառյալ Հայոց ցեղասպանության շարունակվող հերքումը և Հյուսիսային Կիպրոսի օկուպացումը՝ կոնգրեսական Փալոունը հորդորել է իր գործընկերներին դեմ քվեարկել այս օրինագծին:
Արմեն Հովհաննիսյան
«Ամերիկայի Ձայն»
