Մարդասիրական տեսանկյունից անհրաժեշտ է ապահովել, որպեսզի ծանր, հիմնականում՝ անբուժելի, հիվանդություններ ունեցող դատապարտյալները որոշակի մեղմացումների հնարավորություն ստանան:
Ինչպես «Փաստինֆո» գործակալության թղթակցի հետ զրույցում նշեց ՀՀ արդարադատության առաջին փոխնախարար Գրիգոր Մուրադյանը, ՀՀ իրավական ու դատական բարեփոխումների 2012-16 թթ. բարեփոխումների ռազմավարական ծրագրում ընդգրկված է ազատազրկման ձևով պատիժը կրող դատապարտյալին ծանր հիվանդության հիմքով ազատելու կարգը բարեփոխելու հարցը: «Թերևս պատժիչ միտումից պետք է անցում անել ռեսոցիալիզացիայի միտումին: Սա է ամբողջ գաղափարախոսությունը»,- ասաց փոխնախարարը, պարզաբանելով, որ դատապարտյալը մի կողմից պետք է կարևորի իր վերափոխումը, մյուս կողմից պետք է հասկանա, որ հնարավորություն ունի վերաինտեգրվելու հանրությանը, և ինքն այլևս օտար չէ հանրության համար միայն այն պատճառով, որ սխալվել է: «Նա պետք է հեռանկար ունենա, հեռանկարի բացակայությունն ուղղակիորեն հանգեցնում է հանցագործների վերարտադրությանը քրեակատարողական համակարգում»,- ասաց արդարադատության առաջին փոխնախարարը, հավելելով, որ նաև ծանր հիվանդ դատապարտյալի համար պետք է հնարավորություն լինի, որպեսզի ինքը «պայմանական ասած՝ իր մեղքը քավի նաև այլ, ոչ այնքան ծանր պայմաններում, ինչպիսին քրեակատարողական հաստատությունում պահվելն է»:
Բարեփոխումների ռազմավարական ծրագրում ընդգրկված է նաև ՀՀ արդարադատության նախարարության կառուցվածքում քրեակատարողական ծառայությունից անկախ և առանձին պրոբացիոն ծառայության ստեղծումը: Ծառայության հիմնական գործառույթն է լինելու այլընտրանքային պատիժների կիրառումը:
Գրիգոր Մուրադյանը այլընտրանքային պատիժների շարքում հիշատակեց, մասնավորապես, հանրային աշխատանքները, որոնք ըստ էության ազատության որոշակի սահմանափակում են ենթադրում, բայց ոչ ազատազրկում:
Կարդացեք նաև
«Մենք մտածում ենք նաև տնային կալանքի ինստիտուտի վերաբերյալ: Դեռ վերջնական եզրահանգումներ չկան, բայց, ինչու չէ, ըստ անհրաժեշտության նաև, հավանաբար, դա կնախատեսվի: Այսինքն՝ բոլոր այն դեպքերում, երբ առանց ազատության սահմանափակման քրեական հարկադրանքը նույն արդյունավետությամբ, ինչ և ազատության սահմանափակման պարագայում, հասնելու է իր նպատակին, անհրաժեշտ է նախընտրել այլընտրանքային միջոցները: Սա կնպաստի նաև որոշ չափով քրեակատարողական հիմնարկների գերծանրաբեռնվածության նվազեցմանը»,- ասաց ՀՀ արդարադատության առաջին փոխնախարարը: Նա ընդգծեց, որ այլընտրանքային պատիժների համակարգի հիմնական առանցքն այն է, որ ապահովվի ու լիարժեք կենսագործվի Սահմանադրությամբ ամրագրված համաչափության սկզբունքը: «Եթե մենք սա ապահովում ենք, այս իմաստով բավականին մոտենում ենք ժամանակակից իրավական պետություններին»,- ասաց Գրիգոր Մուրադյանը:
«Փաստինֆո» լրատվական գործակալություն
