Այսօր ՀՀ սփյուռքի նախարարությունում տեղի ունեցավ «Արի տուն» ծրագրի 5-րդ փուլի բացումը, որին մասնակցում են շուրջ 220 պատանիներ` Ֆրանսիայից, Գերմանիայից, Լեհաստանից, Արգենտինայից, Ավստրալիայից, ԱՄՆ-ից, ՌԴ մարզերից, Ուկրաինայից, Բելոռուսից, Էստոնիայից, Վրաստանից, Ղազախստանից, Իրաքից, Իրանից եւ Սիրիայից:
Ողջունելով մասնակիցներին` սփյուռքի նախարար Հրանուշ Հակոբյանն ասաց, որ վերջիններս այսօր կայցելեն Երեւանի պատմության թանգարան, ապա կմեկնեն Օշական` ծաղիկներ դնելու Մեսրոպ Մաշտոցի շիրմին:
Նախարարը փաստեց, որ սփյուռի յուրաքանչյուր երիտասարդի համար երազանք է գալ հայրենիք, որի մասին նրան մանկուց պատմել են ծնողներն ու ուսուցիչները. «Ցանկանում եմ, որ այս ընթացքում ոչ միայն ծանոթանաք ձեր երկրին, այլեւ ձեռք բերեք բարեկամներ եւ ընկերներ: Բոլոիրիդ կոչ եմ անում անգիր սովորել ՀՀ օրհներգը եւ ծրագրի ընթացքում խոսել միայն հայերեն` մոռանալով այն երկրի լեզուն, որտեղ ապրում եք»: Դիմելով Սիրիայից ժամանած հայրենակիցներին` տիկին Հակոբյանն ասաց, որ վերջիններս մինչ սեպտեմբեր կարող են մնալ այստեղ:
Կարդացեք նաև
Ելույթի խոսքում Շենգավիթ համայնքի հյուրընկալ ընտանիքի մայր Մարետա Մխիթարյանը նշեց, որ երկրորդ անգամ է հյուրընկալում սփյուռքահայ երկուական երեխայի. «Ուրախ եմ,, որ կարողանում ենք եռանդ ներդնել` սփյուռքի երիտասարդներին հայերեն խոսել սովորեցնելու գործում: Այս ծրագրի շնորհիվ նրանք հայ են մնում»:
Լուիզա ՍՈՒՔԻԱՍՅԱՆ
