ՀԱԿ ակտիվիստներին 2-6 տարվա ազատազրկման դատապարտելու Կենտրոն եւ Նորք Մարաշ վարչական շրջանների ընդհանուր իրավասության դատարանի երեկվա որոշումը բլոգեր Տիգրան Քոչարյանի (Փիղ ) կարծիքով, ՀԱԿ-ի նկատմամբ քաղաքական հետապնդում չէ: Հիշեցնենք, որ ԱԺ ՀԱԿ պատգամավոր Արամ Մանուկյանը երեկ այս որոշումը որակեց քաղաքական հետապնդում ընդդիմության նկատմամբ: «ՀԱԿ-ը միշտ էլ ամեն ինչ որակում է որպես քաղաքական հետապնդում, ես համաձայն չեմ, որ հետապնդում են, նույնիսկ իմ կարծիքով, այս որոշումը ինչ-որ չափով քաղաքականապես ձեռնտու է ՀԱԿ-ին, քանի որ առիթ է հանդիսանում կանգնեցնել ՀԱԿ-ի շարքերից մարդկանց փախուստը, և մնացածներին միավորելու՝ հանուն երիտասարդներին ազատելու պայքարի»,- Aravot.am-ի հետ զրույցում նման կարծիք հայտնեց Տ. Քոչարյանը:
Ըստ նրա, ակտիվիստներից Տիգրան Առաքելյանի պատժաչափը՝ 6 տարվա ազատազրկումը, շատ էր, իսկ մյուս ակտիվիստներին էլ ազատազրկելը անտեղի .«Մնացածին պետք էր ազատել դատարանի դահլիճից, տուգանքը բավարար էր: Կարծում եմ, որ Վերաքննիչ դատարանը մի փոքր կմեղմացնի պատիժը, ուղղակի օրենսդրությունը պետք է վերանայվի, ու տուգանքների չափը ավելացվի: Մեր երկրում ամենաուղղիչ մեթոդը գրպանին խփելն է»:
Պարոն Քոչարյանից հետաքրքրվեցինք, ակտիվիստների նկատմամբ ընդունված դատավճիռը ինչ արձագանք կգտնի Հայաստանին վերաբերող միջազգային զեկույցներում.«Կախված է նրանից, թե միջազգային կառույցները կուզենա՞ն դա որպես լրացուցիչ ճնշման գործիք օգտագործել, թե՞ ոչ: Ամեն դեպքում ոստիկանին հարվածելը քրեորեն պատժելի արարք է, ուղղակի լավ կլիներ, որ նույնանման կամ ավելի ծանր հանցագործությունների դեպքում էլ, որոնք կատարվում են տարբեր տիպի օխռաննիկների, օլիգարխամերձ մարդկանց և այլոց կողմից, նույնպիսի խստությամբ պատժվեն՝ անկախ նրանից դիմությա՞ն, թե՞ ընդդիմության ներկայացուցիչ են»:
Արփինե ՍԻՄՈՆՅԱՆ
