Ինչպես արդեն տեղեկացրել ենք, այսօր Կենտրոն եւ Նորք Մարաշ վարչական շրջանների ընդհանուր իրավասության դատարանը ՀԱԿ ակտիվիստներին 2-6 տարի ազատազրկման դատապարտելու վճիռ կայացրեց: Ակտիվիստների պաշտպան Ստեփան Ոսկանյանն ասաց, որ վճիռը մեկամսյա ժամկետում բողոքարկելու են Վերաքննիչ դատարանում:
«Իրավաբանությունն այստեղ զրո է, իրավաբանություն իրականացնողներն էլ են զրո, բացարձակ մասնագիտական մեխանիզմը չգործեց, ծիծաղելի է, որ այս ձեւի դեպքերի համար նման հոդվածներ են տալիս: Նման դրսեւորումը դատավորի ու դատախազի կողմից ցույց է տալիս, որ նրանք գործիք են ու այսօր ապացուցեցին, որ համաձայն են գործիք լինելու»,- դատական վճռի հրապարակումից հետո գնահատեց ԱԺ ՀԱԿ պատգամավոր, ՀՀՇ նախագահ Արամ Մանուկյանը:
Ըստ նրա` դատարանի որոշումը քաղաքական ճնշում էր ընդդիմության նկատմամբ.«Ատամ են ցույց տալիս ընդդիմության նկատմամբ, մենք էլ պետք է մեր ատամը ցույց կտանք: Տիգրանը մեր կուսակցության անդամ է, միջազգային բոլոր կառույցները, որի անդամ է ՀՀՇ-ն, կդիմենք, քաղաքական բոլոր ուժերը, որոնք շահագրգռված են Հայաստանում քաղբանտարկյալ չլինելու մեջ, կներգրավվեն այս գործին: Մենք ազատելու են տղերքին, բայց պատժվելու են գործիքները, որոնք ծառայում են մեկին»:
Դատավարության ավարտից հետո ՀԱԿ համախոհները դատարանի դրսում ցույց էին կազմակերպել: «Հանրապետությունում չի լինելու արդարադատություն այնքան ժամանակ, քանի դեռ Հայաստանի քաղաքացիները չեն մեկտեղվել Ազատության հրապարակում՝ չհեռանալու պայմանով, այնքան ժամանակ քանի դեռ չի հաստատվել վերջնական արդարադատություն»,- հավելեց ԱԺ ՀԱԿ պատգամավոր Նիկոլ Փաշինյանը:
Կարդացեք նաև
Արփինե ՍԻՄՈՆՅԱՆ
