Սյունիքի մարզում 5587 աշխատանք փնտրող քաղաքացի կա, որոնցից 4388-ը գործազուրկ են: Կապանի զբաղվածության մարզային կենտրոնի այս տարվա առաջին կիսամյակի տվյալների համաձայն` գործազրկության ամենաբարձր ցուցանիշը գրանցվել է Գորիսում:
Սյունիքում ապրող ու գրանցված գործազուրկներից 1809-ը Գորիսի տարածաշրջանի բնակիչներ են, հաջորդ տեղում Կապանի տարածաշրջանն է` 1289 գործազուրկով: Գործազուրկի կարգավիճակ ունեցող 940 բնակիչ էլ կա Սիսիանի եւ 350-ը` Մեղրու տարածաշրջաններում:
Ի տարբերություն նախորդ տարվա նույն ժամանակահատվածի` Սյունիքում նվազել է ինչպես գործազուրկների, այնպես էլ` աշխատանք փնտրողների թիվը: Մարզում աշխատանք փնտրողների թիվը ընթացիկ տարվա առաջին կիսամյակի տվյալներով` նվազել է 1336-ով, իսկ գործազուրկներինը` 730-ով: «Աշխատանք փնտրողների գերակշիռ մասը Սյունիքում շարունակում են մնալ միջնակարգ եւ միջնակարգ մասնագիտական կրթություն ունեցող միջին տարիքի կանայք:
Սյունիքում գործազրկության նպաստ է ստացել 543 քաղաքացի` շուրջ մոտ 9 մլն դրամի չափով: Մարզի զբաղվածության չորս կենտրոնների աջակցությամբ, այս տարվա առաջին կիսամյակում աշխատանքի է տեղավորվել 377 աշխատանք փնտրող քաղաքացի, որից 209-ը կանայք են», – տեղեկացնում է Կապանի զբաղվածության մարզային կենտրոնի փոխտնօրեն Արայիկ Հայրապետյանը :
Կարդացեք նաև
Մերի ՍՈՂՈՄՈՆՅԱՆ
